Ordu.az xəbər verir ki, bu barədə 2026-cı il mayın 6-da LBCI telekanalı ABŞ Dövlət Departamentindəki mənbələrə istinadən məlumat yayıb.
Danışıqlarda Livan tərəfini ABŞ-dəki keçmiş səfir Simon Karamın rəhbərlik etdiyi diplomat və hərbçilərdən ibarət qrup təmsil edəcək.
Bundan əvvəl respublika prezidenti Mişel Aun bildirmişdi ki, bu mərhələ birbaşa danışıqlar formatına keçid üçün əsas yaradacaq.
Tərəflər arasında dialoq Donald Tramp administrasiyasının vasitəçiliyi ilə Dövlət Departamentinin binasında aparılır və artıq 2026-cı il aprelin 17-dən etibarən “sükut rejimi”nin təmin olunmasına imkan verib. Daha sonra bu rejim əlavə üç həftə müddətinə uzadılıb.
Livan tərəfinin vurğuladığına görə, Beyrut üçün əsas prioritet atəşkəsin yenidən uzadılması və ölkənin cənub bölgələrindən qüvvələrin çıxarılması üzrə təqvimin müəyyən edilməsidir.
Eyni zamanda İsrail daha sərt şərtlər irəli sürərək şiə “Hizbullah” silahlı qruplaşmasının tam tərksilah olunmasını və uzunmüddətli sülh sazişinin imzalanmasını tələb edir.
Beləliklə, qarşıdakı görüş tərəflərin təhlükəsizlik tələbləri ilə ərazi iddiaları arasında kompromis tapa bilib-bilməyəcəyini müəyyən etməlidir.
Sevinc Əliyeva
Ordu.az
