Ordu.az xəbər verir ki, bu barədə “The War Zone” məlumat yayıb.

İki maşın 1-ci Süvari Diviziyasına təhvil verilib. Onların hazırlanması, istehsalı və çatdırılması sınaqlar üçün “BAE Systems” tərəfindən maliyyələşdirilib.

AMPV 30 variantının qiymətləndirilməsi yeni imkanların, eləcə də əlaqəli taktika, texnika və prosedurların sürətli tətbiqinə yönəlmiş “Transformation In Contact” (TIC) 2.0 təşəbbüsü çərçivəsində həyata keçirilir.

Eyni zamanda ABŞ ordusu hazırda bu modifikasiyanı satın almağı planlaşdırmır.

2014-cü ildə “Bradley” platforması əsasında hazırlanmış AMPV köhnəlmiş M113 zirehli transportyor ailəsini və əlaqəli vasitələri əvəz etmək üçün seçilmişdi.

Hazırkı proqram top silahlanması olmayan beş əsas AMPV variantını əhatə edir: M1283 ümumi təyinatlı maşın, M1284 tibbi təxliyə maşını, M1285 tibbi yardım maşını, M1286 komanda məntəqəsi variantı və M1287 minaatan daşıyıcısı.

Sınaq konfiqurasiyası Norveçin “Kongsberg Defence” şirkətinin istehsalı olan uzaqdan idarə olunan MCT-30 döyüş modulu ilə təchiz olunub. Modul “Mk 44” “Bushmaster II” avtomatik topu və elektro-optik və infraqırmızı sensorlara malik müasir atəş idarəetmə sisteminə sahibdir.

ABŞ Dəniz Piyadaları Korpusu artıq oxşar modula malik ACV 8×8 təkərli amfibiya döyüş maşınının bir variantını satın alır. Bu proqramın da əsas podratçısı “BAE Systems”dir.

MCT-30 modullu AMPV ilk dəfə 2024-cü ildə ictimaiyyətə nümayiş etdirilib. Həmin vaxt qüllə əlavə olaraq “Javelin” tank əleyhinə raket buraxılış qurğusu ilə təchiz edilmişdi.

Bundan əlavə, “BAE Systems” müxtəlif döyüş modullarının sürətli inteqrasiyası üçün yeni üst gövdə plitəsinin quraşdırılmasını nəzərdə tutan “External Mission Equipment Package” (ExMEP) sistemini hazırlayır. Şirkətin məlumatına görə, sistem 30-dan çox qüllə növünü dəstəkləyə bilər.

Bundan əvvəl AMPV platformasında 120 mm özüyeriyən minaatan və qısa mənzilli hava hücumundan müdafiə sistemi variantları da nümayiş etdirilmişdi.

Sevinc Əliyeva
Ordu.az