Ordu.az xəbər verir ki, o bu barədə Kiyev Təhlükəsizlik Forumunun 18-ci illik toplantısı zamanı “Deutsche Welle”yə müsahibəsində danışıb.

Onun qiymətləndirməsinə görə, regional təhlükəsizlik baxımından ən kritik dövr 2027-2029-cu illər olacaq. Bu müddətdə Alyans öz müdafiə imkanlarının yerləşdirilməsini tamamlayacaq.

Kreml bu vaxt aralığını hücum başlatmaq üçün son şans kimi görür. Çünki 2030-cu ildən sonra Avropanın müdafiə qabiliyyətləri əhəmiyyətli dərəcədə artacaq və “fürsət pəncərəsi” bağlanacaq.

Rusiya komandanlığı Ukraynaya qarşı müharibə zamanı səfərbər edilmiş resurslardan istifadə edərək qüvvələri Baltik ölkələri və Finlandiya sərhədlərinə yerləşdirməyi, bununla da Qərb müttəfiqlərinə birbaşa hərbi təzyiq göstərməyi planlaşdırır.

Hazırda Rusiya rəhbərliyi artıq ölkənin şimalında yeni hərbi obyektlərin tikintisinə başlayıb. Pudans qeyd edib ki, Kalininqrad bölgəsində hazırda hücum əməliyyatları aparmaq üçün kifayət qədər silah yoxdur, lakin düşmən bunu hibrid müharibə taktikaları ilə kompensasiya edir.

Buraya davamlı sabotajlar, kiberhücumlar və Latviya, Litva və Estoniya sərhədlərində süni miqrasiya təzyiqinin yaradılması daxildir.

General Moskvanın bu cür addımlarını zəiflik və sürpriz amilinin itirilməsi əlaməti kimi xarakterizə edib. Hər yeni təxribat Latviya institutlarını yalnız silahlı qüvvələrin deyil, həm də bələdiyyələrin və mülki sektorun dayanıqlığını gücləndirməyə məcbur edir.

Ölkədə təhlükəsizlik məsuliyyətinin bütün dövlət qurumları və qeyri-hökumət təşkilatları arasında bölüşdürüldüyü ümummilli müdafiə konsepsiyası tətbiq olunur.

Latviya müasir döyüş əməliyyatlarında avtonom sistemlər və süni zəkanın istifadəsi sahəsində Ukraynanın təcrübəsini fəal şəkildə mənimsəyir.

Pudans vurğulayıb ki, Latviyanın müdafiə xətti birbaşa Ukrayna ərazisindən keçir və buna görə Latviya tərəfi döyüş meydanında yeni texnologiyaların tətbiqinə maksimum dəstək verir. Prioritet insansız quru platformaları və pilotsuz uçuş aparatlarının inkişafıdır.

“Biz Ukraynadan yalnız texnikadan istifadəni öyrənmək istəmirik. Bizim unikal, bəlkə də qeyri-rəsmi və müdafiə xarakterli bir ittifaqımız var, lakin biz tam anlayırıq ki, Latviyanın və Baltik ölkələrinin müdafiə xətti Ukraynadan keçir”, - deyə general bildirib.

Latviya parlamenti müdafiə xərclərinin ÜDM-in 5%-i həcmində olmasını tələb edən qanun qəbul edib və ölkə artıq faktiki olaraq bu göstəriciyə çatıb.

Müdafiə büdcəsinin yarıdan çoxu ən yeni texnikanın alınmasına və texnoloji həllərin inkişafına yönəldilir.

Sevinc Əliyeva
Ordu.az