Ordu.az xəbər verir ki, təlimin başladığını Estoniyanın dövlət yayım qurumu ERR elan edib.
Manevrlərin ən intensiv mərhələsində Estoniya və müttəfiq ölkələrdən 12 mindən çox hərbi qulluqçu iştirak edəcək.
Təlimin əsas məqsədinin Estoniya diviziyası və NATO qüvvələri ilə birlikdə konvensional müharibə ssenarisində müdafiə əməliyyatlarının planlaşdırılması və icrasını sınaqdan keçirmək olduğu açıqlanıb.
Təlim çərçivəsində xüsusilə 2-ci Piyada Briqadası ilə könüllü müdafiə qüvvəsi “Kaitseliit”in Cənub Müdafiə Bölgəsi elementlərinin fəaliyyəti qiymətləndirilir.
Sərhədlərarası əməliyyat və Ukrayna müharibəsi dərsləri
Mayın 4-də başlayan və iyunun 1-dək davam edəcək təlimlər Estoniyanın cənub bölgələri ilə yanaşı, Latviyanın şimal-şərq hissəsini də əhatə edir.
Latviya ərazilərinin də daxil edilməsi sərhədlərarası əməliyyat qabiliyyətlərinin və müttəfiqlərarası koordinasiyanın inkişaf etdirilməsini hədəfləyir.
Təlimdə Böyük Britaniya, Fransa, ABŞ, Almaniya, Polşa, Kanada, Ukrayna və digər tərəfdaş ölkələrdən birliklər iştirak edir.
Bundan əlavə, Böyük Britaniyaya məxsus 4-cü Briqadanın Estoniya diviziyasına sürətli yerləşdirilməsi və inteqrasiyası ayrıca mövzu çərçivəsində sınaqdan keçirilir.
Ssenarilərin hazırlanmasında Rusiya-Ukrayna müharibəsindən çıxarılan dərslər həlledici rol oynayır.
Xüsusilə pilotsuz uçuş aparatlarının istifadəsi və müasir silah sistemlərinin sahədəki təsiri təlimin əsas diqqət mərkəzində olan mövzular sırasındadır.
Təlim müddətində müdafiə sənayesinə aid yeni həllər də döyüşə ən yaxın şəraitdə sınaqdan keçiriləcək.
Çoxmərhələli struktur və intensiv hava fəaliyyəti
Təlimlər qərargah planlaşdırma mərhələsindən başlayaraq real sursatlarla atışların həyata keçiriləcəyi Mərkəzi Təlim Sahəsindəki tətbiqlərə qədər bir neçə mərhələdə icra olunacaq.
Aktiv mərhələdə döyüş təyyarələri, hücum təyyarələri və pilotsuz uçuş aparatlarının xüsusilə aşağı hündürlükdə həyata keçirəcəyi uçuşlar ilə hərbi karvanların ictimai istifadəyə açıq yollardakı hərəkəti diqqət çəkən elementlər arasında yer alır.
Digər tərəfdən, qısa müddət əvvəl ukraynalı təlimatçıların Almaniyadakı Bundesver təlim mərkəzlərində alman hərbi qulluqçularına təlim verməyə başladığı da bildirilib.
Sevinc Əliyeva
Ordu.az
