Məlumata görə, təmaslar qeyri-müntəzəm xarakter daşıyır və hələlik nəticə verməyib. Eyni zamanda, elan edilmiş atəşkəsə baxmayaraq, İsrail Livan ərazisinə zərbələri davam etdirir ki, bu da atəşkəs rejiminin faktiki pozulmasını göstərir. Ümumilikdə regionun uzunmüddətli eskalasiya vəziyyətində qaldığı, yeni gərginləşmə risklərinin isə davam etdiyi bildirilir.

Ordu.az çərşənbə gecəsi Yaxın Şərqdə baş verən əsas hadisələrin qısa icmalını təqdim edir.

Məlumata görə, ABŞ dövlət katibi Marko Rubio İran əleyhinə “Epik qəzəb” əməliyyatının başa çatdığını bəyan edib. Vaşinqton bu mərhələni tamamlayaraq indi “Azadlıq” layihəsinə keçir. ABŞ prezidenti Donald Tramp bildirib ki, Hörmüz boğazında gəmilərin müşayiəti ilə bağlı “Azadlıq” layihəsi İranla razılaşmanın yekun hazırlanması və imzalanması imkanlarını qiymətləndirmək üçün qısa müddətə dayandırılacaq.

Rubio Ağ Evdə keçirdiyi brifinqdə qeyd edib ki, ABŞ tərəfi BMT Təhlükəsizlik Şurasının Hörmüz boğazındakı vəziyyətlə bağlı qətnamə layihəsinə dəyişikliklər edib. Bundan başqa, ABŞ İranı Hörmüz boğazında gəmilərin müşayiəti üzrə “Azadlıq” əməliyyatı barədə xəbərdar edib və müdaxilə olacağı təqdirdə cavabla hədələyib.

Sevinc Əliyeva
Ordu.az