Ordu.az xəbər verir ki, bunu erməni politoloq, Avropa Araşdırmaları Mərkəzinin rəhbəri Vladimir Martirosyan deyib.

Onun sözlərinə görə, müxtəlif manipulyasiyalar da aparılır.

“Mən əminəm ki, bu mərhələdə siyasi qüvvələr real sosioloji sorğuların nəticələrini açıqlamırlar, onları saxlayır və təhlil edirlər.

Mən Ermənistanda seçki prosesinin bu qədər erkən başlandığı başqa bir dövr xatırlamıram. Seçki kampaniyası çox tez başlayıb və ən tez başlayan da Nikol Paşinyandır. Bu gün o, ön sıradadır, çünki müxtəlif vasitələrlə işləyir. Onun “ev tapşırığı” var. O, daim tibbi sığorta haqqında danışır, bayram və sosial mövzuları qabardır, çünki bu, cəmiyyətin müxtəlif təbəqələrinin daha çox cəlb olunmasına imkan yaradır. Mən bunu müxalifətdə görmürəm.

Təəssüf ki, parlamentə düşmək şansı olan siyasi qüvvələrin narrativləri Nikol Paşinyanın siyasi narrativlərindən ciddi şəkildə fərqlənmir”, - deyə Martirosyan qeyd edib.

Erməni politoloq bildirib ki, Nikol Paşinyan dördüncü respublikanın yaradılması istiqamətində hərəkət edir.

“Hansı müxalif siyasi qüvvələr buna qəti şəkildə qarşıdır, yeni Konstitusiyanın qəbuluna etiraz edir və üçüncü respublikanın narrativlərinin qoruyucusu olduqlarını bəyan edir? Seçici aydın şəkildə bilməlidir ki, siyasi təkliflə çıxış edənlər bir-birindən nə ilə fərqlənir. Bu fərqi anlamaq bu gün seçici üçün ən böyük problemdir.

Paşinyan müharibə təhlükəsi ilə bağlı qorxu yayır və bu, işləyir. Onun bütün mexanizmləri bu istiqamətdə effektiv fəaliyyət göstərir və bu, onu tənqid edənlərin mövqeyindən daha təsirli şəkildə cəmiyyətə çatır. İctimai müstəviyə daxil olan üçüncü narrativ isə hibrid müharibə narratividir. Hakimiyyət bundan öz xeyrinə istifadə edəcək.

Paşinyan anlayır ki, bu dəfə yenidən hakimiyyətə gəlmək onun üçün daha çətindir, çünki uğursuzluq yalnız sakit həyatını itirmək deyil, həm də məsuliyyət qarşısında qalmaq deməkdir. O, bir növ dönüş nöqtəsindədir və buna uyğun hərəkət edir. Mən bu yanaşmanı müxalifətdə görmürəm”, - deyə o bildirib.

Erməni politoloq sual verib ki, müxalif qüvvələr Paşinyanın yenidən hakimiyyətə gəlməsinin qarşısını almaq üçün hansı qiyməti ödəməyə hazırdır?

“Lazımi ictimai enerji mövcud deyil. Mənim təəssüratım odur ki, hamı müəyyən çərçivələr daxilində hərəkət edir və bu çərçivədən çıxmaq istəmir. Müxalifətin tempi kifayət deyil. Onlar siyasi neytral seçici kütləsi ilə Paşinyanın etdiyi qədər aktiv işləmirlər.

Paşinyanın yaratdığı kontent xoşumuza gəlsə də, gəlməsə də, bu, əsas deyil. Əsas odur ki, bu kontent informasiya məkanını doldurur və hamı tərəfindən müzakirə olunur. Müxalifətin boşluğu Paşinyan və onun yaratdığı informasiya ilə doldurulur.

Bu, “həcm effekti” adlanır. İnsanlar adətən qalib gəlmə ehtimalı yüksək olanın arxasınca gedirlər. Biz adi vəziyyətdə deyilik. Seçkilər iki il sonra keçirilmir ki, yaxşı və pis arasında seçim edək. Paşinyan, yaxşı və ya pis olmasından asılı olmayaraq, bu vəziyyətdə olan hər bir insanın edəcəyini edir.

Əgər müxalifət düşünürsə ki, populizm etməməlidir və seçicilərlə yalnız “dürüst” davranmalıdır, bu halda populizmi Paşinyan edəcək və seçicini öz tərəfinə çəkəcək. Əgər müxalifət Qarabağ mövzusundan danışmaqdan çəkinirsə, bu mövzunu tələb edən seçiciləri itirəcək. Bu dövr “tam dürüstlük” dövrü deyil, daha çox səsləri qazanmaq uğrunda mübarizə dövrüdür”, - deyə o vurğulayıb.

Martirosyan qeyd edib ki, müxalifət siyasəti sosiologiyanın nəticələrinə çevirib.

“Mən bu rəqəmləri bilirəm, əsas problem seçici iştirakıdır. Bu sahədə müxalifətin potensialı hakimiyyətdən daha böyükdür. Məqsəd qoyulmalıdır ki, bu dəfə ən azı 1,5 milyon insan seçkilərdə iştirak etsin. Bunun üçün işləmək lazımdır. Müxalifət isə öz “komfort zonasından” çıxmaq istəmir. Halbuki seçkilərdə iştirak etmək istəməyən insanlarla işləməlidirlər.

Paşinyan artıq əvvəlki legitimliyi təmin edə bilməyəcək. ABŞ rəsmilərinin səfərləri və Avropa siyasi birliyinin liderlərinin gəlişi vasitəsilə o, daxili legitimlik çatışmazlığını xarici legitimliklə kompensasiya etməyə çalışır. Avropa siyasi birliyinin formatı 2022-ci ildə yaradılıb və əsasını Ukrayna məsələsi və anti-Rusiya yanaşması təşkil edir. Zelenskinin səfəri Rusiyada belə qiymətləndiriləcək ki, Ermənistan anti-Rusiya siyasətinin mərkəzinə çevrilir. Erməni istəyir ki, ölkəsinin rəhbəri ondan daha yüksək səviyyəli və sanballı olsun. Heç bir halda qeyri-müəyyən seçicilərin səsini Paşinyana vermək olmaz. İnsanlardan xahiş etmək lazımdır ki, siyasətdən uzaqlaşmasınlar və ümumi prosesin bir hissəsinə çevrilsinlər”, - deyə o bildirib.


Alpər Mövludoğlu
Ordu.az