Ordu.az xəbər verir ki, bu barədə DPA məlumat yayıb.

Beləliklə, Avropa Siyasi Birliyinin səkkizinci sammiti ilk dəfə Almaniya hökuməti rəhbərinin iştirakı olmadan keçiriləcək.

“Kansler digər öhdəliklər səbəbindən səfər edə bilməyəcək”, - deyə səfərin ləğv olunmasının səbəbləri ilə bağlı sorğuya cavab olaraq hökumət nümayəndəsi DPA agentliyinə bildirib.

“Federal kansler artıq Avropa Siyasi Birliyinin iki görüşündə iştirak edib və bir çox iştirakçılarla aktiv əlaqələri saxlayır”, - deyə o əlavə edib.

İrəvana getmək əvəzinə Merts bazar ertəsi Berlində Xristian Demokrat İttifaqı partiyasının rəhbərliyinin iclasında iştirak edəcək. Həmin gün üçün kanslerin digər ictimai tədbirləri barədə Federal Mətbuat Bürosu hələlik məlumat verməyib.

Almaniyanı kanslerin əvəzinə kimin təmsil edəcəyi hələ müəyyən edilməyib.

Avropa Siyasi Birliyi 2022-ci ildə Fransa prezidenti Emmanuel Makronun təşəbbüsü ilə yaradılıb və məqsədi Avropa İttifaqı ilə Avropanın digər dövlətləri arasında daha sıx yaxınlaşmanı təmin etməkdir. İlk sammit Praqada keçirilib, bundan sonra daha altı yüksək səviyyəli görüş təşkil olunub və indiyədək onların hamısında Almaniya hökumətinin rəhbəri iştirak edib.

Olaf Şolts beş sammitdə, Fridrix Merts isə son iki sammitdə iştirak edib, həmin iki sammit ötən il Albaniya və Danimarkada keçirilib.

Sammitlərə demək olar ki, bütün Avropa dövlətləri, o cümlədən Türkiyə və Ukrayna dəvət olunur. Rusiya və Belarus iştirak etmir.

Alpər Mövludoğlu
Ordu.az