Ordu.az xəbər verir ki, bu barədə Ukrayna Müdafiə Nazirliyi və NATO məlumat yayıb.
Məlumatda qeyd olunur ki, Ukraynaya qarşı həyata keçirilən hər bir Rusiya hava əməliyyatı aerodromlardan başlayır. Bu səbəbdən tərəflər düşmən aerodromlarının fəaliyyətini davamlı şəkildə məhdudlaşdıracaq həllərin axtarışına başlayıblar.
NATO-nun Müttəfiq Transformasiya Komandanlığı və NATO-Ukrayna Birgə Təhlil, Təlim və Təhsil Mərkəzi tərəfindən təşkil olunan “Persistent Airfield Denial” adlı müsabiqədə iştirakçılardan düşmənin aviasiya infrastrukturundan istifadəsini məhdudlaşdıracaq texnologiyalar təqdim etmək tələb olunur.
Müsabiqə çərçivəsində təyyarələr, uçuş-enmə zolaqları, yanacaq və sursat anbarları, eləcə də yerüstü dəstək obyektlərinin fəaliyyətinin pozulmasına yönəlmiş həllər nəzərdən keçiriləcək.
Müdafiə sənayesi şirkətləri, startaplar və mühəndis qrupları müsabiqəyə qoşulmağa dəvət olunub. Mükafat fondu 250 min avroya qədər təşkil edir. Müraciətlər 2026-cı il iyulun 20-dək qəbul ediləcək, finalçılar isə avqustun 11-də elan olunacaq.
Müsabiqənin təşkilatçıları bildirirlər ki, Rusiyanın arxa cəbhədə qorunan aerodromlardan istifadə etməsi hazırkı müharibədə onun əsas üstünlüklərindən biridir. Rusiya taktiki aviasiyası idarə olunan aviasiya bombalarından, qanadlı raketlərdən və digər uzaqmənzilli silahlardan istifadə edir.
Layihənin əsas məqsədi təyyarələrə, uçuş-enmə zolaqlarına, yanacaq anbarlarına, sursat ehtiyatlarına və yerüstü infrastruktura qarşı davamlı təsir göstərə biləcək texnoloji həllərin müəyyən edilməsidir.
Müsabiqə Ukrayna Silahlı Qüvvələrinin döyüş təcrübəsinə əsaslanır və radioelektron mübarizəyə davamlı, istənilən hava şəraitində işləyə bilən, üç ay ərzində tətbiq edilə bilən avtonom sistemlərin hazırlanmasını nəzərdə tutur. Buraya pilotsuz uçuş aparatları və pilotsuz uçuş aparatları sürüləri də daxildir.
Tələblərə əsasən, sistemlər GPS olmadan işləməli, radioelektron mübarizə vasitələrinə davamlı olmalı və aktiv əks-təsir şəraitində fəaliyyət göstərə bilməlidir. Hədəflərin avtomatik aşkarlanması və məhv edilməsi üçün süni zəka texnologiyalarının tətbiqi də nəzərdə tutulur.
Sistemlər gecə-gündüz, ilin bütün fəsillərində, duman, güclü yağış və qar daxil olmaqla müxtəlif hava şəraitində işləməli, eyni zamanda bir neçə hədəfə qarşı paralel fəaliyyət göstərə bilməlidir.
Finalçılar öz layihələrini Varşavada təqdim edəcəklər. İlk üç yerin qalibləri 250 min avroluq mükafat fondunu bölüşəcək və NATO-nun müdafiə strukturları ilə gələcək əməkdaşlıq imkanları əldə edəcəklər.
Müsabiqədə yalnız NATO ölkələrində və ya Ukraynada rəsmi qeydiyyatdan keçmiş təşkilatlar iştirak edə bilərlər.
Sevinc Əliyeva
Ordu.az
