Ordu.az xəbər verir ki, bunu Rusiyalı analitik Vladimir Yevseyev ABŞ-İran qarşıdurmasını şərh edərkən deyib.

Onun sözlərinə görə, danışıqların əsas problemi hazırda zənginləşdirilmiş uranın sonrakı taleyidir.

“Bununla bağlı əvvəllər müxtəlif təkliflər olub, hazırda isə ABŞ bəzi təkliflər irəli sürüb, onu başqa ölkəyə köçürməyi təklif edib. Tehran, böyük ehtimalla, nüvə məsələsində mümkün razılaşmalardan əvvəl müəyyən zəmanətlər almaq istəyir, üç mərhələdən ibarət təklifin təqdim olunmasının səbəbi də budur.

İran xarici işlər nazirinin Moskvaya səfərinin bütün bunlarla birbaşa əlaqəsinin olması istisna deyil. Xatırlatmaq istəyirəm ki, bəzən müzakirələrin gündəliyində zənginləşdirilmiş uranın Rusiyaya köçürülməsi məsələsi olub, Rusiya onu qəbul etməyə hazır olub. Düşünürəm ki, bu müzakirələr zamanı İranın əsas danışıqlar aparan şəxslərindən birinin Rusiyaya səfər etməsi heç də təsadüfi deyil. Digər mühüm məsələ odur ki, ABŞ İranın uranın zənginləşdirilməsini 20 il müddətinə dayandırmasını istəyir, İran buna da hazır deyil. Tərəflər arasında problemli danışıqlar məsələlərindən biri də İran aktivlərinin blokdan çıxarılmasıdır. Aydındır ki, tərəflər öz siyasi qırmızı xətlərini və “üzlərini” qorumaq məsələsini qarşıya qoyublar, lakin müharibəni davam etdirmək istəyi də yoxdur”, - deyə Yevseyev bildirib.

O, bununla belə hesab edir ki, uğur əldə olunmasa, ABŞ bəlkə də təzyiqin başqa mexanizmlərindən istifadə etməyə çalışacaq.

“Lakin onu da nəzərə almaq lazımdır ki, ABŞ-də qarşıdakı aylarda daxili siyasi proseslər gözlənilir və bu, ABŞ prezidentinin uzunmüddətli planlaşdırma imkanını məhdudlaşdırır. İranda bunu anlayaraq öz taktikalarını qurmağa çalışırlar”, - deyə o qeyd edib.

Cənubi Qafqazdan danışan analitik bildirib ki, hazırkı vəziyyət davam etdikcə Cənubi Qafqaz proqnozlaşdırıla bilən geosiyasi mühitdə qalmağa davam edəcək.

“Bununla belə, İranın daha sərt mövqelənməsi bütün qonşulara, o cümlədən Cənubi Qafqaz istiqamətində Bakıya və İrəvana ehtiyatlılıq verir. İranın mövqelərini hələlik görməzdən gəlmək çətindir”, - deyə Yevseyev bildirib.

Alpər Mövludoğlu
Ordu.az