Ordu.az xəbər verir ki, aprelin 24-də açıqlanan razılaşmalar proqramın sənaye iştirakı və texniki əhatəsi ilə bağlı yeni detalları ortaya qoyub.
12 şirkət layihəyə daxil edildi
“Space Systems Command” tərəfindən verilən müqavilələr çərçivəsində 12 fərqli şirkət kosmos əsaslı önləyici sistemlər hazırlayacaq. Proqram aşağı Yer orbitində yerləşdiriləcək çoxtəbəqəli önləmə arxitekturasının yaradılmasını hədəfləyir.
Layihəyə “Lockheed Martin”, “Northrop Grumman”, “Raytheon” və “SpaceX” kimi böyük müdafiə şirkətləri ilə yanaşı, fərqli sektorlardan firmalar da daxil edilib.
2028 hədəfi ilə inteqrasiya planlaşdırılır
ABŞ Kosmik Qüvvələri rəsmiləri hazırlanan önləyici sistemlərin 2028-ci ilə qədər “Qızıl Günbəz” arxitekturasına inteqrasiya edilməsinin planlaşdırıldığını açıqlayıblar. Uzunmüddətli perspektivdə isə aşağı orbitdə yerləşdiriləcək çoxsaylı peyklərdən ibarət önləmə şəbəkəsinin qurulması hədəflənir.
Sistem ballistik, hipersəs və digər qabaqcıl raket təhdidlərinə qarşı kosmos əsaslı izləmə elementlərini, önləyiciləri və süni zəka dəstəkli analiz imkanlarını birləşdirəcək.
Süni zəka dəstəkli təbəqəli müdafiə
ABŞ Kosmik Qüvvələrinin açıqlamasında deyilir: “Mövcud raket müdafiə sistemləri ilə yeni nəsil kosmos əsaslı sensorlar və önləyicilər təhdidlərin sürətinə və manevr qabiliyyətinə qarşı çıxmaq üçün süni zəka ilə inteqrasiya edilməlidir”.
Açıqlamada həmçinin aşağı Yer orbitində yerləşdiriləcək önləyicilərin qalxma, orta mərhələ və süzülmə mərhələlərində nişanalma qabiliyyəti təmin edəcəyi bildirilib.
Təhdidlər sürətlə inkişaf edir
ABŞ Kosmik Qüvvələrinin Kosmik Güc üzrə proqram rəhbəri Brayon MakKleyn bildirib: “Rəqiblərin imkanları sürətlə inkişaf edir və bizim tədarük proseslərimiz bundan da yüksək sürətlə irəliləməlidir”.
MakKleyn fərqli sektorlardan şirkətlərin layihəyə daxil edilməsinin rəqabəti artırdığını və innovasiyanı sürətləndirdiyini bildirib.
Xərc və miqyas müzakirələri
“Qızıl Günbəz” proqramının direktoru Maykl Getlayn xərc səmərəliliyinin proqramın gələcəyi baxımından həlledici olacağını vurğulayaraq bildirib: “Əgər kosmosdan qalxma mərhələsində önləmə xərc baxımından dayanıqlı deyilsə, fərqli variantlara yönələcəyik”.
Proqramın ümumi xərcinin və əhatəsinin qurulacaq önləyici peyk şəbəkəsinin ölçüsündən asılı olaraq formalaşacağı bildirilir.
Uzunmüddətli investisiya planı
“Qızıl Günbəz” proqramı üçün 2027-ci maliyyə ili büdcəsində təxminən 400 milyon dollarlıq vəsait tələb edilir, sonrakı dövrdə isə əlavə maliyyələşdirmənin təmin olunması planlaşdırılır.
ABŞ Kosmik Qüvvələri proqramın inkişaf edən təhdidlərə qarşı texnoloji üstünlüyün qorunmasında kritik rol oynayacağını qiymətləndirir.
Sevinc Əliyeva
Ordu.az
