Ordu.az xəbər verir ki, bu barədə Ermənistanın “168.am” nəşri yazıb.
Mövzu ilə bağlı 168 TV-nin “Review” proqramının qonağı Ermənistan Hərbi Sənaye Komitəsinin keçmiş sədri (2018-2020-ci illər) Avetik Kerobyan olub.
Erməni ekspert vurğulayır ki, 2020-ci ilin yayında Tavus sərhədində baş verən hərbi toqquşmalar, 2020-ci ilin payızındakı 44 günlük müharibə və 2020-ci ildən sonra baş verən bütün hərbi əməliyyatlarla bağlı çoxlu yalanlar dövriyyədədir.
Onun sözlərinə görə, acınacaqlısı odur ki, erməni xalqı bu günədək həmin hadisələr barədə yalnız parça-parça həqiqətləri və ya yarımçıq həqiqətləri bilir.
Ermənistanın keçmiş Baş Qərargah rəisinin “dövriyyədə olan bütün yalanları partlatmaq” barədə açıq çağırışı ilə bağlı Avetik Kerobyan Almaniya imperiyasının ilk kansleri Otto fon Bismarkın məşhur sözlərini xatırladıb: “İnsanlar heç vaxt seçkiqabağı dövrdə, müharibə zamanı və ovdan sonra olduğu qədər yalan danışmırlar”.
Avetik Kerobyan əmindir ki, Onik Qasparyanın 44 günlük müharibə və müharibədən sonrakı hadisələr mövzusunda parlamentdə qapalı müzakirə keçirmək təklifi və “dövriyyədə olan bütün yalanları partlatmaq” çağırışı sadəcə “səhnələşdirmədir”. Onun fikrincə, məqsəd Nikol Paşinyanın siyasi keçmişini təmizləmək və siyasi gələcəyini təmin etməkdir. Kerobyanın sözlərinə görə, Onik Qasparyan tutduğu vəzifənin məsuliyyətini dərk etmirdi.
“Burada biz təkcə Onik Qasparyanın hüquqi qiymət verilməli olan bəyanatları ilə yox, həm də Nikol Paşinyanın vəzifə cinayətləri barədə özünü ifşa edən etiraf xarakterli açıqlamaları ilə qarşı-qarşıyayıq.
Əlbəttə, həmin vaxtdan beş ildən çox keçib, amma unutmamalıyıq ki, Nikol Paşinyan Ermənistana qarşı cinayətlər barədə çoxsaylı etiraf xarakterli bəyanatlar verib və bu günədək cəzalandırılmayıb”, - deyə Avetik Kerobyan bildirib.
44 günlük müharibə və müxtəlif epizodlardan danışan keçmiş erməni komitə sədri xüsusilə oktyabrın 10-da qüvvəyə minmiş qısa atəşkəsi xatırladıb. O bildirib ki, həmin vaxt özü ön xətt mövqelərində olub və birbaşa şahid kimi görüb ki, atəşkəsi ilk pozan erməni tərəfi olub. Onun sözlərinə görə, indiyədək cavab verilməyib ki, niyə erməni tərəfi atəşkəsi pozub və niyə Gəncə hava limanının raket atəşinə tutulduğu elan edilib?
“Mən general Onik Qasparyanla müharibədən sonra ilk dəfə dekabrın 10-u ətrafında görüşdüm. Həmin vaxt ordumuzun təmas xəttinin şimal hissəsini qoruyan korpuslarından biri Vardenisdən Cermuka qədər, oradan da daha cənuba çəkilmiş, yeni mövqelər tutmuşdu və hətta qardan, yağışdan belə qorunmurdu. Siz bilirsiniz ki, Cermukun şimal mövqelərində qış havası nə deməkdir.
Qoşun tamamilə müdafiəsiz vəziyyətdə, təchiz edilməmiş mövqelərdə idi, amma general Onik Qasparyan öz məsuliyyətini üzərindən atmaqla və guya sərhəd qoşunlarının üzərinə qoymaqla məşğul idi. Təxminən iki ay yarım sonra hökumətin istefası tələbi ilə məşhur bəyanat yayıldı.
Həmin axşam və növbəti axşam mən yenə Onik Qasparyanla görüşdüm. O, ümumiyyətlə tutduğu vəzifənin məsuliyyətini dərk etmirdi. Məncə, müharibə zamanı da həmin vəzifənin məsuliyyətini anlamayıb. Çünki Ermənistan müharibə elan etməsə belə, Onik Qasparyan Silahlı Qüvvələrin baş komandanı olaraq qalırdı və qərarları özü qəbul etməli, qoşunların idarə olunmasını özü həyata keçirməli idi.
Bununla yanaşı, biz bilirik ki, qoşunların idarə olunmasında vəzifəsinə görə heç bir səlahiyyəti olmayan şəxslər iştirak ediblər. Məsələn, baş nazirin o zamankı həyat yoldaşı... Biz həmçinin bilirik ki, Onik Qasparyan Nikol Paşinyana qərarlar qəbul etməyə imkan verib. Hətta davam edən hərbi əməliyyatlar zamanı Silahlı Qüvvələrin planlaşdırılmış əməliyyatlarını xarici mediaya verdiyi müsahibədə açıqlayıb, məşhur RBC müsahibəsini xatırlayırıq. O, tabeliyində olan qoşunların heç olmasa informasiya təhlükəsizliyini təmin etmək üçün tədbir görməyib.
Həmin vaxt Onik Qasparyan Nikol Paşinyanın həbs edilməsi barədə əmr verməli idi. Çünki həmin adam qeyri-sabit vəziyyətdə idi və Ermənistan Silahlı Qüvvələrinin maraqlarına zidd hərəkətlər edirdi. Bunu etmədi. Əlbəttə, həmin dövr keçib, amma indi qalxıb “Bilirsiniz nə var, mən üzləşməyə hazıram, amma qapalı qapılar arxasında” demək, bağışlayın, bu, Nikol Paşinyanın siyasi keçmişini təmizləmək və siyasi gələcəyini təmin etmək istiqamətində çox pis gizlədilmiş cəhddir”, - deyə Avetik Kerobyan şərh edib.
O xatırladıb ki, indiki hakimiyyət həm 2016-cı ildəki dördgünlük müharibə, həm də 2020-ci ildəki 44 günlük müharibə ilə bağlı iki istintaq komissiyası yaradıb.
Avetik Kerobyan deyib ki, hər ikisinə parlamentin Müdafiə və Təhlükəsizlik məsələləri daimi komissiyasının sədri, “Vətəndaş Müqaviləsi” partiyasından Andranik Köçəryan rəhbərlik edib və onların hesabatları gizli qalıb.
“Ötən beş il ərzində çox vaxtları olub ki, bir çox faktları gizlətsinlər, izləri itirsinlər. Əminəm ki, əməliyyatların planlaşdırılması xəritələrində düzəlişlər edilib ki, məlumatsızlığı, savadsızlığı və uğursuzluqların səbəblərini gizlətsinlər.
Əminəm ki, bu istintaq komissiyasının hesabatının açıqlanmasının gecikdirilməsi və plenar iclasda müzakirə edilməməsi yalnız bir məqsəd daşıyır: öz cinayətlərini, öz hərəkətsizliklərini və bu hərəkətsizlik nəticəsində baş vermiş həm ərazi, həm də insan itkilərini gizlətmək. Andranik Köçəryan cavab verməlidir. Bu gün parlament sədri vəzifəsini tutan Alen Simonyan da cavab verməlidir, çünki parlament dar maraqlı qrup deyil. Parlament xalqa cavabdeh olan, ölkəmizdə ilkin mandatla təchiz olunmuş yeganə qurumdur”, - deyə Kerobyan əlavə edib.
Nəşr xatırladıb ki, aprelin 17-də Ermənistan parlamentində “Hayastan” fraksiyasının rəhbəri, keçmiş müdafiə naziri Seyran Ohanyan Nikol Paşinyana müraciətlə demişdi ki, əgər generallar qaçıblarsa, bu, Nikol Paşinyanın məsuliyyətidir.
Ohanyan bildirmişdi: “Cənab Paşinyan, “müdafiə ordusu”nun 283 km müdafiə xətti var idi və onun 265 km-ni oktyabrın 27-dək bir ay saxlayıblar. Sizin dediyiniz generallar həmin ərazidən qaçıblar və mən hesab edirəm ki, bu, sizin məsuliyyətinizdir. Çünki əgər qərarı “müdafiə ordusu” qəbul edirsə, onu Baş Qərargah və ya “Qarabağ rəhbəri” təsdiqləyir. Əgər bir neçə hərbi birləşmədirsə, “müdafiə ordusu” və bir neçə Ermənistan hərbi birləşməsidirsə, qərarı Baş Qərargah rəisi verir, siz isə təsdiqləyirsiniz. Azərbaycan sizin məsuliyyət zonanızdan keçərək Şuşaya, Laçın istiqamətinə və Ermənistan sərhədlərinə , Gorus, Qafan, Mehri sərhədlərinə çatıb”.
Nəşrə görə, bu bəyanata aprelin 19-da keçmiş Baş Qərargah rəisi Onik Qasparyan cavab verərək parlamentdə 2020-ci il müharibəsi və müharibədən sonrakı hadisələr mövzusunda qapalı müzakirə təşkil etməyi təklif etmiş və demişdi: “Reallıqla üzləşməyin, dövriyyədə olan bütün yalanları və əsassız manipulyasiyaları partlatmağın vaxtı çatıb”.
Nikol Paşinyan isə aprelin 2-də keçirilmiş brifinq zamanı jurnalistin sualına cavab olaraq bəzi generalları “qorxaq” və “talançı” adlandırdığını təsdiqləmişdi.
“Mən deməmişəm ki, generallar qorxaqdır, demişəm ki, qorxaq generallar və fərarilər var, bəli, onların çoxu məhkəmə qarşısındadır. Bizim qanunsuz əmlak işi üzrə keçən talançı generallarımız var, korrupsiya işləri üzrə keçən generallarımız var və general epoleti heç kimi... Ümumiyyətlə, hesab edirəm ki, “qəhrəman” sözünü çox ehtiyatla işlətməliyik. Çünki bu sözü o qədər işlətmişik ki, nəticədə həqiqi qəhrəmanları şifahi qəhrəmanların içində itirmişik.
Yoxsa bu nə yenilikdir ki, yenə mübahisə predmetinə çeviriblər. Bizim on minlərlə döyüş tapşırığını yerinə yetirməkdən imtina etmiş adamımız var, bunu kimdən gizlədirik, başa düşmək istəyirəm...
Bilirsiniz nə var, insanlar öz qaçmalarını, öz aradan çıxmalarını mənim əmrlərimlə bağlamasınlar. Mən belə əmrlər verməmişəm. İnsanlar istəyiblər ki, belə əmrlər alsınlar, mən isə belə əmrlər heç vaxt verməmişəm. Belə danışan adam qaçanların ordusundandır. Mən üzr istəyirəm o insanlardan ki, öz mülki və hərbi borclarını sonadək yerinə yetiriblər. Söhbətdə belə alınır ki, yaşla qurunu qarışdırırlar. Mən heç vaxt yaşı quruya qatmaram və insanları da, əşyaları da öz adı ilə çağırıram.
Bəli, bizdə qorxaq generallar olub. Korrupsiya nəticəsində general olmuş adam nə olmalıdır ki? Ümumiyyətlə, bu, hərbçi görünüşüdürmü? Qarnı 3 metr qabağa çıxmış general nədir?” - deyə Nikol Paşinyan bildirmişdi.
Alpər Mövludoğlu
Ordu.az
