Ordu.az xəbər verir ki, sistem 250 kilometrə qədər məsafədə 20 kiloqrama qədər faydalı yük daşıma qabiliyyətinə malikdir.

Ukrayna Müdafiə Sənayesi Milli Birliyi (NAUDI) pilotsuz uçuş aparatının “Wings & Quadro” tərəfindən hazırlandığını açıqlayıb.

“Swan-X 20”nin Ukrayna ilə Slovakiya arasındakı əməkdaşlıq çərçivəsində hazırlandığı və uzunmənzilli zərbə tapşırıqları icra etmək üçün layihələndirildiyi bildirilib.

NAUDI tərəfindən verilən açıqlamada qeyd edilib: “Swan-X 20”, ağır xidmət tipli orta sinfə məxsus platforma müasir müharibənin çətin şərtlərində xüsusi tapşırıqları yerinə yetirmək üçün hazırlanıb”.

Mənzil və daşıma qabiliyyəti diqqət çəkir

Pilotsuz uçuş aparatı 20 kiloqrama qədər faydalı yük daşıya bilir və 250 kilometrə qədər taktiki mənzildə tapşırıq yerinə yetirə bilir. Bu mənzilin 300 kilometrə qədər artırılmasının hədəfləndiyi bildirilir. Platformanın maksimal sürəti 160 km/s səviyyəsinə çatır, havada qalma müddəti isə 95 dəqiqəyə qədər yüksəlir.

Bundan əlavə, ayrı bir layihə çərçivəsində benzin mühərrikli variantın da hazırlandığı bildirilib. Bu versiyanın 50 kiloqrama qədər faydalı yük daşıya bilməsi və 300 kilometrdən çox mənzilə çatması gözlənilir.

Hazırda “Swan-X 20”nin kodifikasiya prosesinə hazırlanmaqda olduğu bildirilib.

Sevinc Əliyeva
Ordu.az