Ordu.az xəbər verir ki, bu barədə “Rostec” Dövlət Korporasiyasının baş direktorunun müavini Nikolay Volobuyev məlumat verib.

Məlumata görə, bununla yanaşı, bu texnikadan döyüş şəraitində istifadə etmiş hərbçilər mühəndis hazırlığına cəlb olunaraq elmi-tədqiqat və təkmilləşdirmə proseslərinə daxil edilir.

Volobuyevin sözlərinə görə, Bauman adına Moskva Dövlət Texniki Universitetində Rusiyanın “Xüsusi Hərbi Əməliyyat” adlandırdığı döyüşlərdə iştirak etmiş veteranlar üçün xüsusi proqram istifadəyə verilib. Proqram çərçivəsində cəbhə təcrübəsinə malik şəxslər texniki təhsil alaraq birbaşa müdafiə sənayesində fəaliyyət göstərəcəklər.

Döyüş təcrübəsi elmi-tədqiqat işlərinə inteqrasiya olunur

“Rostec” və “Vətənin Müdafiəçiləri” Fondunun təşəbbüsü ilə Rusiya Elm və Ali Təhsil Nazirliyinin dəstəyi əsasında həyata keçirilən proqram hərbi texnikadan döyüş şəraitində istifadə etmiş şəxslərin praktiki təcrübəsinin akademik biliklərlə birləşdirilməsini hədəfləyir.

Nikolay Volobuyev bildirib ki, T-90 platforması özünü etibarlı zirehli döyüş maşını kimi təsdiqləsə də, onun təkmilləşdirilməsi fasiləsiz davam edir.

Onun sözlərinə görə, döyüş şəraitində texnikadan istifadə etmiş hərbçilərin təcrübəsi həm mövcud sistemlərin modernləşdirilməsi, həm də yeni texnologiyaların hazırlanması baxımından böyük əhəmiyyət daşıyır.

Volobuyev əlavə edib ki, veteranların mühəndis kimi fəaliyyət göstərə bilmələri üçün bütün zəruri şərait yaradılıb.

T-90M “Proryv” tanklarına PUA və radioelektron mübarizə yeniləməsi

Cəbhədən daxil olan operativ məlumatlar əsasında “Uralvaqonzavod” tərəfindən istehsal olunan T-90M “Proryv” tanklarında son aylarda mühüm konstruktiv və elektron təkmilləşdirmələr həyata keçirilib.

Bu çərçivədə, xüsusilə FPV kamikadze tipli PUA-lar və digər asimmetrik PUA təhdidlərinə qarşı istifadə olunan radioelektron mübarizə sistemləri əhəmiyyətli dərəcədə gücləndirilib.

Bundan əlavə, platformanın ən həssas hissələrindən biri hesab edilən mühərrik-transmissiya bölməsinin yuxarı hissəsinə şaquli hücumların qarşısını almaq məqsədilə əlavə passiv mühafizə modulları və zireh elementləri quraşdırılıb.

“Uralvaqonzavod”da aparılan mühəndislik işləri zirehli texnikanın passiv və aktiv mühafizə sistemlərinin qarşılıqlı fəaliyyətini təmin etməklə ekipajın təhlükəsizliyini və tankın döyüşdə sağqalma imkanlarını artırmağa yönəlib.

Müdafiə sənayesində veteranların məşğulluğu genişləndirilir

Bauman Universitetində həyata keçirilən proqram yalnız sosial layihə deyil, həm də müdafiə sənayesində geribildirim mexanizmini sürətləndirməyə hesablanmış strateji təşəbbüs kimi qiymətləndirilir.

Bildirilir ki, tankların texniki imkanlarını, nasazlıqlarını və döyüş şəraitində zəif tərəflərini birbaşa cəbhədə müşahidə etmiş şəxslərin mühəndis hazırlığı alaraq elmi-tədqiqat bölmələrində çalışması gələcək nəsil hərbi sistemlərin hazırlanması və modernləşdirilməsi prosesinə mühüm töhfə verə bilər.

Sevinc Əliyeva
Ordu.az