Ordu.az xəbər verir ki, bu barədə xarici KİV-lər məlumat yayıb.
ABŞ Konqresinin Tədqiqat Xidməti tərəfindən yayımlanan hesabata görə, “Dark Eagle” quru əsaslı hipersəs raket sistemi kimi yüksək dəyərli və zaman həssaslığı olan hədəflərə qarşı uzun mənzilli dəqiq zərbə qabiliyyəti təmin etmək üçün hazırlanır. Sistem təxminən 1.725 mil mənzilə malikdir və güclü şəkildə qorunan hədəflərə qarşı dərin zərbə tapşırıqlarında istifadə olunmaq üçün layihələndirilib.
Hesabatda qeyd edilib: “Quru Qoşunları komandanları LRHW (Dark Eagle) sistemindən yüksək prioritetli və zaman həssaslığı olan hədəflərə qarşı istifadə edəcək”. Bundan başqa, sistemin istifadəsi ilə bağlı səlahiyyətin ABŞ Strateji Komandanlığına aid olacağı bildirilib.
Hipersəs texnologiyası və texniki xüsusiyyətlər
“Dark Eagle” iki mərhələli raket gücləndiricisi və hipersəs süzülmə aparatı olan “Common Hypersonic Glide Body” əsasında hazırlanır. Sistem “Mach 5” və daha yüksək sürətlərdə manevr qabiliyyəti ilə hərəkət edərək onun aşkar edilməsini və qarşısının alınmasını çətinləşdirir.
Raket komponenti “Lockheed Martin” və “Northrop Grumman” tərəfindən hazırlanarkən, süzülmə aparatı ABŞ Quru Qoşunları ilə Sandia Milli Laboratoriyalarının əməkdaşlığı çərçivəsində layihələndirilir.
Təşkilati struktur və yerləşdirmə
Sistem batareya əsaslı struktur ilə yerləşdirilir. Hər batareyaya bir batareya əməliyyat mərkəzi, bir neçə buraxılış qurğusu maşını, dəstək ünsürləri və səkkizədək raket daxildir.
İlk operativ bölmənin Vaşinqton ştatındakı “Joint Base Lewis-McChord” bazasında yerləşdiyi və 3-cü Artilleriya Alayının 5-ci Taborunun sistemin ilk istifadəçi bölməsi olaraq müəyyən edildiyi bildirilib.
Sınaq prosesi və yaşanan gecikmələr
Proqram 2021 və 2022-ci illərdə baş verən uğursuz sınaqlara görə gecikmələrlə üzləşib. 2023-cü il ərzində planlaşdırılan bəzi sınaqlar da texniki yoxlamalardan sonra ləğv edilib və bu hal sistemin planlaşdırılan təqvimə uyğun olaraq xidmətə qəbulunu gecikdirib.
Lakin 2024-cü ildə keçirilən sınaqlarda mühüm irəliləyiş qeydə alınıb. 2024-cü il iyununda keçirilən sınaqda raket 2.000 mildən çox məsafə qət edərək hədəfini uğurla vurub. 2024-cü il dekabrında keçirilən sınaq isə sistemin tam operativ konfiqurasiya ilə ilk canlı atışı olub.
2026-cı il martın 26-sı “Cape Canaveral” Kosmik Qüvvələr bazasından keçirilən son sınağın da uğurla başa çatdığı açıqlanıb.
Dəyər və nəzarət prosesi
Hipersəs raket sistemlərinin dəyəri proqramın ən kritik başlıqlarından biri kimi önə çıxır. ABŞ Konqresinin Büdcə Ofisi oxşar sistemlərin vahid dəyərini təxminən 41 milyon dollar kimi qiymətləndirərkən, mövcud xərclərin daha yüksək ola biləcəyi bildirilir.
ABŞ Quru Qoşunlarının komandanı general Rendi Corc bildirib: “Yay aylarında daha aşağı dəyərli uzun mənzilli raket sınaqlarına hazırlaşırıq”.
Sevinc Əliyeva
Ordu.az
