Ordu.az xəbər verir ki, bu barədə Türkiyə KİV-ləri məlumat yayıb.
“Universitet-Müdafiə Sənayesi Güc Birliyi Mərasimi” çərçivəsində “ASELSAN Akademiya Məzuniyyət Mərasimi və ASELABS Açılışları” proqramı vitse-prezident Cevdet Yılmaz, MSK sədri Haluk Görgün, ASELSAN baş direktoru Ahmet Akyol, universitet rektorları və akademiklərin iştirakı ilə ASELSAN Gölbaşı Texnologiya Bazasında keçirilib.
Universitet-sənaye əməkdaşlığı vurğusu
Görgün burada çıxışında bildirib ki, universitetlərin bilik bazası ilə müdafiə sənayesinin yüksək texnologiya istehsalı qabiliyyətini eyni məqsəd ətrafında güclü iradə ilə birləşdiriblər.
Milli alt sistemlərin və universitet-müdafiə sənayesi əməkdaşlığı çərçivəsində hazırlanan layihələrin Türkiyənin texnologiya yolunda çatdığı səviyyəni aydın şəkildə göstərdiyini vurğulayan Görgün qeyd edib ki, mühəndislərin əməyi və qurumlararası güclü koordinasiya “Türkiyə Əsri”nin yüksək texnologiya vizyonuna mühüm dinamika qazandırıb.
Müdafiə sənayesi vizyonu
Müdafiə sənayesini strateji düşüncənin, qabaqcıl mühəndisliyin, davamlı tədqiqat mədəniyyətinin və güclü insan resursunun birləşdiyi seçkin sahələrdən biri kimi xarakterizə edən Görgün çıxışını belə davam etdirib:
“Biz universitet-sənaye birliyini çox dəyərli inkişaf modeli kimi görürük. Bu model akademik işi sahədəki ehtiyaclara yaxınlaşdırır, mühəndislik qabiliyyətini elmi istehsalla qidalandırır və strateji texnologiyalarda ölkəmizin rəqabət gücünü daha yüksək səviyyəyə çatdırır. Bu sayədə güclü sinerji yaranır, universitetlərimiz elmi dərinlik təmin edir, sənaye qurumlarımız məhsullaşdırma gücü təqdim edir və gənclərimiz bu ekosistemin dinamizmini artırır. Beləliklə, ölkəmiz öz ehtiyaclarına öz həllərini hazırlayan, texnoloji müstəqilliyini gücləndirən və gələcəyin bacarıqlarını indidən formalaşdıran ölkə kimi yoluna daha möhkəm addımlarla davam edir”.
Liderlik və dəstək vurğusu
Görgün müdafiə sənayesinin son illərdə yüksəlişinə istiqamət verdiyinə və yüksək texnologiya yönümlü vizyona göstərdiyi dəstəyə görə prezident Rəcəb Tayyib Ərdoğana təşəkkür edib və bu liderliyin sektorun institusional potensialına və beynəlxalq rəqabət qabiliyyətinə geniş perspektiv açdığını vurğulayıb.
ASELFLIR-500 təhvili
Universitetlərlə aparılan işlərin ASELSAN-ın məhsul və sistemlərində texnoloji dərinliyi artıran alt komponentlərin necə inkişaf etdiyini göstərdiyini bildirən Görgün qeyd edib ki, bu güclü istehsal zəncirinin mühüm simvolu kimi ASELFLIR-500 sisteminin 150-ci simvolik təhvili də həyata keçirilib.
Görgün bildirib: “ASELFLIR-500 yüksək texnologiyalı alt sistemləri, güclü mühəndislik yanaşması və ekosistemimizin ortaq əməyinin nəticəsi olan çox mühüm uğurdur. Bu təhvil akademik bilginin sənaye gücü ilə birləşməsini, sənaye gücünün isə sahəyə yüksək qabiliyyət kimi əks olunmasını təmsil edir”.
ASELSAN Akademiya və ASELABS
Haluk Görgün Ali Təhsil Şurasının himayəsi ilə Orta Doğu Texniki Universiteti, İstanbul Texniki Universiteti, Gebze Texniki Universiteti, Qazi Universiteti və Hacettepe Universitetinin iştirakı ilə 2017-ci ildə yaradılan ASELSAN Akademiya haqqında da məlumat verib.
ASELSAN baş direktoru Ahmet Akyol isə mövcud “ASELSAN Akademiya” modelindən əlavə “ASELABS” laboratoriyalarını da həyata keçirdiklərini bildirib. Akyol qeyd edib ki, bu laboratoriyalara indiyədək 30 milyon dollar investisiya qoyulub və burada gələcəyin oyun dəyişdirici texnologiyaları üzərində iş aparılacaq.
İstehsal və investisiya göstəriciləri
Müdafiə sənayesində seriyalı istehsal səfərbərliyi dövrünə daxil olunduğunu bildirən Akyol ASELSAN-ın istehsal gücü ilə bağlı aktual məlumatları paylaşıb.
Akyol bildirib ki, 2025-ci ildə 286 min ədəd məhsul təhvil verilib və 150-dən çoxu ÇELİKKUBBE komponenti olmaqla 400 mindən artıq məhsulun istehsal və təhvil prosesi davam edir.
Akyol gücün artırılması üçün başda Oğulbey obyekti olmaqla şirkət üzrə 3 milyard dolları aşan investisiya proqramının davam etdiyini qeyd edib.
Ekosistem və iqtisadi ölçü
Akademiklərdən kiçik və orta biznes subyektlərinə, startaplardan ASELSAN törəmə şirkətlərinə qədər çoxsaylı tərəfdaşların bu texnologiyada imzası olduğunu vurğulayan Akyol bildirib: “ASELSAN kiçik və orta biznesdən sahibkarlara, universitetlərdən akademiklərə qədər uzanan böyük ekosistemin görünən üzüdür. Bu ekosistemi müxtəlif dişliləri olan mexanizmə bənzətsək, ASELSAN bu mexanizmin mərkəzindəki mühərrik kimidir”.
Şirkətin iqtisadi göstəricilərinə də toxunan Ahmet Akyol ASELSAN-ın “Borsa İstanbul”un açıq fərqlə ən dəyərli şirkəti” olduğunu bildirib və əlavə edib:
“ASELSAN dünən yeni rekorda imza atdı. Respublika tariximizdə ilk dəfə bir şirkət olaraq 37 milyard dollar bazar dəyərinə çatdıq. Respublika tarixində bu dəyərə çatan ilk və yeganə türk şirkəti olaraq yolumuza inamla davam edəcəyik.
Akyol həmçinin kiloqram başına 2200 dollara yüksələn ixrac dəyəri və kiçik və orta biznesə yönəldilən illik 4 milyard dollarlıq vəsaitlə ASELSAN-ın Türkiyənin iqtisadi və sosial rifahı üçün əsas aktor olaraq qalacağını əlavə edib”.
Məzuniyyət və akademik nəticələr
Mərasim çərçivəsində akademiklərə “Universitet-Müdafiə Sənayesi Əməkdaşlığı Mükafatları” təqdim olunub və “ASELSAN Akademiya Məzuniyyət Mərasimi” keçirilib.
İndiyədək 536-sı magistr, 20-si doktorantura olmaqla ümumilikdə 556 əməkdaşın məzun olduğu ASELSAN Akademiyada bu il 86 magistr və 9 doktorant olmaqla ümumilikdə 95 ASELSAN əməkdaşı təhsilini uğurla başa vurub.
Proqram çərçivəsində 876-sı magistr, 125-i doktorantura olmaqla ümumilikdə 1001 əməkdaş təhsilini davam etdirir.
2024-2025-ci tədris ili ərzində məzun olan 4 tələbəyə Toxum Layihə Dəstəyi çərçivəsində ümumilikdə 165 min dollar ayrılıb. Eyni dövrdə məzunların dissertasiya işlərindən 27 məqalə və 60 məruzə hazırlanıb.
ASELABS laboratoriyaları
Həmçinin 3 fərqli universitetdə yaradılan 6 ASELABS laboratoriyasının açılışı uzaqdan bağlantı ilə həyata keçirilib.
Türkiyədə ilk dəfə yaradılan ASELABS laboratoriyaları sayəsində akademiklər və ASELSAN mühəndisləri texnologiya inkişafı layihələrində birgə fəaliyyət göstərə biləcəklər.
Bu çərçivədə Orta Doğu Texniki Universitetində Yeni Nəsil Rabitə və Qavrama Texnologiyaları Laboratoriyası, Optomexanika və Fotonika Qabaqcıl Material Texnologiyaları Laboratoriyası və MEMS İnertial Algılayıcı Texnologiyaları Laboratoriyası yaradılıb.
İstanbul Texniki Universitetində RF Mikrodalğa İnnovativ Material Texnologiyaları Laboratoriyası və Sualtı, Suüstü və Avtonomluq Texnologiyaları Laboratoriyası, Hacettepe Universitetində isə Süni Zəka Texnologiyaları Laboratoriyası fəaliyyətə başlayıb.
Sözügedən laboratoriyalarda tədqiqat aparacaq bakalavr, magistr və doktorantura tələbələri yeni nəsil texnologiyalar hazırlayaraq qlobal səviyyədə rəqabət aparmaq imkanı əldə edəcəklər.
Sevinc Əliyeva
Ordu.az
