İrana təzyiqi mərhələli şəkildə artırmaq strategiyasının bir hissəsi olaraq, ABŞ Hərbi Hava Qüvvələrinin İslam İnqilabı Keşikçiləri Korpusunun regional qərargahına qarşı ən böyük qeyri-nüvə bombası olan GBU-57 “Massive Ordnance Penetrator” (MOP) bombasını atdığı bildirilir.
CENTCOM GBU-57 zərbəsini saatlar əvvəl planlaşdırmışdı
“The Wall Street Journal”a görə, ABŞ Mərkəzi Komandanlığının (CENTCOM) əlində Tehranda yeraltı bunkerdə çox sayda yüksək vəzifəli İslam İnqilabı Keşikçiləri Korpusu rəhbərlərinin toplanacağı barədə konkret kəşfiyyat məlumatı olub.
B-2 bombardmançıları Missuri ştatındakı “Whiteman” Hərbi Hava Qüvvələri bazasından fəaliyyət göstərir. Hər bir uçuş təxminən 14 min mil məsafəni əhatə edən gediş-gəlişdən ibarətdir.
Bu, daxil olan kəşfiyyat məlumatlarına əsaslanan dinamik əməliyyat olub. B-2 təyyarələrinin hər missiya üçün ABŞ-dən uçması tələb olunduğuna görə, ehtimal olunur ki, CENTCOM qarşıdan gələn toplantı barədə əvvəlcədən məlumat əldə edib və ya yüksək dəyərli hədəf yaranacağı halda istifadəyə hazır vəziyyətdə xüsusi sursatlarla təchiz edilmiş B-2-ləri hazır saxlayıb.
Bu, B-2 təyyarələrinin İran üzərində GBU-57 MOP bombalarını ikinci dəfə istifadə etməsidir. Ötən yay “Midnight Hammer” əməliyyatı zamanı B-2-lər İranın ən ciddi qorunan iki nüvə obyektini bombalamış və hər birinə bir neçə GBU-57 MOP bombası atmışdı.
GBU-57 bunker dələn bombasını hansı təyyarələr daşıya bilər?
B-2 “Spirit” stels tipli strateji bombardmançı ABŞ arsenalında bu sursatı daşıya bilən yeganə təyyarədir. Onun silah bölmələri o qədər genişdir ki, iki ədəd GBU-57 MOP daşıya bilir. Hərbi Hava Qüvvələri B-52 “Stratofortress” təyyarəsinin bu bombanı daşıya bilməsi üçün bəzi sınaqlar aparsa da, bunun üçün təyyarənin konstruksiyasında ciddi dəyişikliklər tələb olunur.
Gələcəkdə hazırda uçuş sınaqlarından keçən və tezliklə kütləvi istehsala daxil olacaq B-21 “Raider” təyyarəsinin ən azı bir GBU-57 MOP daşıya biləcəyi gözlənilir.
GBU-57 bunker dələn bombası haqqında
Uzunluğu: 20,5 fut (6,2 m)
Diametri: 31,5 düym (~0,8 m)
Ümumi çəkisi: təxminən 30 000 funt (~13 600 kq)
Partlayıcı çəkisi: təxminən 5 300 funt (~2 425 kq) yüksək partlayıcı maddə, o cümlədən:
AFX-757: təxminən 4 590 funt (~2 080 kq)
PBXN-114: təxminən 750 funt (~340 kq)
Hədəfləmə: GPS/INS ilə idarə olunur, 20 fut dəqiqlik sapması ilə
Nüfuzetmə qabiliyyəti: ən azı 200 fut (60 m) torpaq və ya möhkəmləndirilmiş beton
GBU-57 MOP ABŞ ordusunun arsenalındakı ən böyük qeyri-nüvə sursatıdır.
Hərbi Hava Qüvvələrinin bu sursatla bağlı missiya təsvirində deyilir:
“Massive Ordnance Penetrator” (MOP) yüksək qorunan obyektlərdə yerləşən kütləvi qırğın silahlarını aşkar etmək və məhv etmək kimi mürəkkəb və çətin missiyanı yerinə yetirmək üçün hazırlanmış silah sistemidir”.
Bu sursat möhkəmləndirilmiş və dərin yeraltı hədəflərə nüfuz etmək üçün hazırlanıb. Bombanın möhkəmləndirilmiş korpusu ilk olaraq bunker və ya dərin yeraltı obyektin üst təbəqəsini dəlir. Daha sonra 5 000 funtluq döyüş başlığı partlayaraq hədəfə böyük zərər verir və bu təsir qapalı mühitdə daha da güclənir. Hədəfdən asılı olaraq B-2 ilk sursatın açdığı kanala əlavə bombalar da ata bilər ki, bu da hədəf üzərində dağıdıcı təsiri artırır.
Sevinc Əliyeva
Ordu.az
