Ordu.az xəbər verir ki, bu barədə Türkiyə KİV-ləri məlumat yayıb.

Açıqlamada bildirilib ki, qəza baş verənədək uçuş zamanı heç bir anomaliya qeydə alınmayıb, hadisə qəfil baş verib və kritik məlumat qeydləri kəsilib.

Uçuş məlumatları normal gedişi göstərir

Nazirliyin qiymətləndirməsinə görə, uçuş məlumat qeydiyyatçısı (FDR) məlumatları araşdırılıb və qəza anına qədər uçuş heyətinin danışıqlarında və sistem məlumatlarında heç bir nasazlıq aşkar edilməyib.

Açıqlamada qeyd olunub: “Uçuş məlumat qeydiyyatçısı qeydləri araşdırıldıqda, qəza anına qədər rəqəmsal məlumat qeydlərində uçuş heyətinin danışıqlarında və təyyarənin sistemlərində hər şeyin normal davam etdiyi, heç bir nasazlığın aşkar edilmədiyi müəyyən olunub”.

Qeydlər ani qopma səbəbindən kəsilib

Türkiyə MMN qəzanın kritik anına dair məlumatların məhdud olduğunu bildirərək, bunun texniki qopma ilə bağlı olduğunu açıqlayıb.

Açıqlamada deyilir: “Təyyarənin quyruq konus hissəsinin gövdədən ayrılması nəticəsində FDR-a aid enerji və məlumat kabellərinin qopması səbəbindən qeydin dayandığı, buna görə də qeydiyyat cihazında qəzanı aydınlaşdıracaq əlavə məlumatların olmadığı müəyyən edilib”.

Bu vəziyyət qəzanın qəfil və yüksək təsirli struktur zədələnmə nəticəsində baş vermiş ola biləcəyini göstərir.

Mühərrik və pərlərdə nasazlıq aşkar edilməyib

Qəza ilə bağlı texniki araşdırmalarda təyyarənin mühərrik və pər sistemlərində heç bir nasazlıq əlamətinin olmadığı vurğulanıb. Türkiyə MMN bildirib: “Mühərrik və pərlərin qəza anına qədər problemsiz şəkildə işlədiyi müəyyən edilib”.

Həmçinin pər qırılması nəticəsində gövdə zədələnməsi ehtimalının da istisna edildiyi qeyd olunub.

Partlayıcı izinə rast gəlinməyib

Jandarma Kriminal Xidməti tərəfindən qalıqlardan götürülmüş nümunələr üzərində aparılan araşdırmalarda daxili və ya xarici mənbəli hər hansı partlayıcı maddə izinə rast gəlinmədiyi bildirilib.

Bu nəticə qəzanın sabotaj və ya xarici müdaxilə ehtimalını zəiflədən mühüm amil kimi qiymətləndirilir.

Material analizləri davam edir

Qəzanın səbəbi ilə bağlı texniki analiz prosesinin davam etdiyi bildirilib və xüsusilə materialların qırılma sınaqlarından əldə edilən ilkin nəticələr açıqlanıb.

Türkiyə MMN qeyd edib: “Qırılmaların yorulma mənşəli olmadığı, lakin dartılma testlərində materialların kövrək yorulma davranışı göstərdiyi müəyyən edilib”.

Qırıq kəsik analizlərinə dair yekun hesabatların isə hələ tamamlanmadığı və araşdırmanın davam etdiyi bildirilib.

Yekun hesabat gözlənilir

Mövcud nəticələr qəzanın qəfil baş verən struktur nasazlıq nəticəsində baş vermiş ola biləcəyini göstərsə də, dəqiq səbəbin müəyyən edilməsi üçün texniki analizlərin tamamlanması gözlənilir. Türkiyə MMN prosesin çoxşaxəli şəkildə davam etdiyini və əldə olunacaq yeni nəticələrin ictimaiyyətlə paylaşılacağını bildirib.

Sevinc Əliyeva
Ordu.az