Ordu.az xəbər verir ki, Cənubi Koreyanın aparıcı hüceyrə inkişaf etdiricisi texnologiya şirkəti olan “Top Material” ilə “ASPİLSAN Enerji”nin rəhbərliyi altında həyata keçiriləcək litium-ion batareya hüceyrəsi istehsal xətti investisiyası, texnologiya transferi və ixrac əməkdaşlığını əhatə edən geniş razılaşma imzalanıb.
Razılaşma çərçivəsində litium-ion batareya hüceyrəsi istehsal xəttinin qurulması üçün 5,2 milyon dollarlıq “açar təhvil” müqavilə ilə yanaşı, “ASPİLSAN Enerji” tərəfindən həyata keçiriləcək elektrod materiallarının ixracına yönəlmiş 600 min dollarlıq əlavə razılaşma da reallaşdırılacaq.
Bu layihə ilə “ASPİLSAN Enerji” yerli istehsal və qabaqcıl mühəndislik qabiliyyətlərini daha da gücləndirəcək, “Top Material” isə layihə çərçivəsində texnologiya transferi və istehsal xəttinin qurulması proseslərinə töhfə verəcək. Bu baxımdan razılaşma “ASPİLSAN Enerji” ilə “Top Material” arasında 2021-ci ildən bəri davam edən əməkdaşlığın strateji olaraq daha yüksək mərhələyə keçdiyini göstərir. Daha əvvəl Türkiyədə qurulan ilk silindrik litium-ion batareya hüceyrəsi istehsal infrastrukturuna töhfə verən bu əməkdaşlıq yeni investisiya ilə daha da inkişaf edir.
Yeni imzalanan razılaşma çərçivəsində LFP (Litium Dəmir Fosfat) hüceyrələrinə yönəlmiş istehsal xətti qurulacaq və onun istifadəyə verilməsinin 2027-ci ildə həyata keçirilməsi planlaşdırılır. “ASPİLSAN Enerji” tərəfindən hazırlanacaq və istehsal ediləcək yeni nəsil yüksək güclü LFP batareya hüceyrələrinin müdafiə, qabaqcıl sənaye tətbiqlərində, missiya və təhlükəsizlik baxımından kritik sistemlərdə istifadə olunması və kritik texnologiyalarda yerlilik səviyyəsinin artırılmasına töhfə verməsi hədəflənir.
Bu əməkdaşlıq eyni zamanda Cənubi Koreya ilə Türkiyə arasında yerli istehsal, texnologiya əldə olunması və üçüncü ölkələrə ixracı inteqrasiya edən ilk və nümunəvi əməkdaşlıq modellərindən biri kimi beynəlxalq sənaye əməkdaşlığında mühüm mərhələ hesab olunur. Texnologiya transferindən kənara çıxan bu struktur “ASPİLSAN Enerji”nin qlobal dəyər zəncirində mövqeyini gücləndirir. “ASPİLSAN Enerji” öz istehsal müəssisələrində hazırladığı batareya hüceyrələri və elektrodları təmin edərək Türkiyədən yüksək əlavə dəyərli ixrac həyata keçirəcək.
“Qlobal bazarda texnologiya ixrac edən bir oyunçu olacağıq”
ASPİLSAN Enerjinin baş direktoru professor doktor Ahmet Turan Özdemir əməkdaşlıqla bağlı belə qiymətləndirmə verib:
“Top Material” ilə əməkdaşlığımızı daha yüksək səviyyəyə qaldırmaqdan məmnunuq. Bu razılaşma yalnız ölkəmizə texnologiya transferi təmin etmir, eyni zamanda ASPİLSAN Enerjinin qlobal bazarlarda texnologiya hazırlayan və ixrac edən bir oyunçu kimi mövqelənməsi baxımından strateji dönüş nöqtəsidir. Daxili imkanlarımızı gücləndirərkən yüksək əlavə dəyərli ixrac və strateji əməkdaşlıqlar vasitəsilə qlobal miqyasda böyüməyə davam edəcəyik”.
“Top Material” şirkətinin baş direktoru Van Cin Roh isə açıqlamasında bildirib: “Bu müqavilə litium-ion batareya istehsal xəttinin qurulmasındakı texnoloji təcrübəmizi və qlobal rəqabət gücümüzü əks etdirir. “ASPİLSAN Enerji” ilə güclü tərəfdaşlığımızı davam etdirərək Türkiyədəki fəaliyyətimizi inkişaf etdirməyə davam edəcəyik”.
“ASPİLSAN Enerji” və “Top Material” daha əvvəl də mühüm layihələrdə bir araya gəlmişdi. Tərəflər 2020-ci ildə Kayseri Sənaye Bölgəsində yerləşən “ASPİLSAN Enerji “müəssisələrində keçirilən tədbirdə Türkiyənin litium-ion batareya hüceyrəsi istehsal müəssisəsi üçün texnologiya transferi əməkdaşlıq razılaşmasını uğurla həyata keçirmişdi. Yeni imzalanan 5,8 milyon dollarlıq bu paket mövcud tərəfdaşlığı LFP hüceyrə istehsalı və yüksək əlavə dəyərli ixrac hədəfləri ilə daha yüksək səviyyəyə qaldırır.
Sevinc Əliyeva
Ordu.az
