Ordu.az xəbər verir ki, qiymətləndirmə prosesi Gələcək Döyüş Komandanlığının (Commandement du combat futur - CCF) tapşırığı ilə bir neçə aydır davam edir.
İşin əsasında Ukrayna müharibəsindən tanış olan bir konsepsiya dayanır: bir pilotsuz uçuş aparatının başqa bir pilotsuz uçuş aparatını havada ovlayaraq məhv etməsi.
Sınaqlar 54-cü Artilleriya Alayının (54e RA) rəhbərliyi ilə, CCF, Quru Qoşunlarının Texniki Bölməsi (STAT) və Fransanın Müdafiə Təchizat Agentliyinin (DGA) koordinasiyası altında, DGA - EM “Levant” sınaq sahəsində aparılır. Bu çərçivədə “Destinus” və “Harmattan AI” tərəfindən hazırlanmış müxtəlif önləyici pilotsuz uçuş aparatı sistemləri qiymətləndirilir.
“Destinus” Avropada yerləşən özəl aviasiya və müdafiə şirkətidir və Ukrayna ilə güclü əlaqələrə malikdir. Şirkətin tərkibində döyüş sahəsi təcrübəsi ilə formalaşmış çoxsaylı ukraynalı mühəndis çalışır. “Destinus” xüsusilə hücum və hava hücumundan müdafiə sistemlərində miqyaslana bilən həllər hazırlayan Avropa müdafiə istehsalçısı kimi mövqelənir, bir çox pilotsuz uçuş aparatı platforması da Ukraynanın əməliyyat ehtiyacları ilə əlaqəli şəkildə hazırlanıb.
Yeni nəsil hava hücumundan müdafiə yanaşması
Fransa Quru Qoşunları bu işlərlə həm klassik pilotsuz uçuş aparatlarına, həm də sabit koordinatlara yönələn “gəzən sursat”lara qarşı effektiv əks-pilotsuz uçuş aparatı qabiliyyəti formalaşdırmağı hədəfləyir. Bu çərçivədə “Şahid” və “Lancet” tipli təhdidlər xüsusilə ön plana çıxır.
Son münaqişələr nisbətən aşağı dəyərli pilotsuz uçuş aparatlarının birliklər, texnika və sabit hədəflər üçün ciddi təhdid yarada bildiyini ortaya qoyur, əvvəllər məhdud tətbiqli hesab olunan sistemlər isə qısa mənzilli hava hücumundan müdafiə anlayışında köklü dəyişikliklərə səbəb olur.
Sınaqları dəstəkləmək məqsədilə 54-cü Alayın tərkibində xüsusi qruplar yaradılıb və bu qruplar iki şirkət tərəfindən təqdim olunan önləyici sistemlərdən istifadə etmək üçün təlim keçiblər. Alayın şəxsi heyəti artıq platformalarla işləməyə başlayıb və sınaq kampaniyası çərçivəsində çoxsaylı real qarşılamanın ssenarisini icra edib.
Bu sahə yönümlü mərhələ sistemlərin idarə olunan nümayişlərdə deyil, real taktiki şəraitdə necə performans göstərdiyini anlamağı hədəfləyir. Bu çərçivədə qrupların nə qədər sürətlə yerləşə bildiyi, hədəfin izlənməsi və nişanalma prosesləri, eləcə də önləyici pilotsuz uçuş aparatlarının təkrarlanan nişanalmadakı effektivliyi qiymətləndirilir.
İşlər qısa müddət əvvəl Fransa Quru Qoşunlarının komandanı general Pyer Şill və Baş Qərargah rəisi general Fabyen Mandona da təqdim edilib. Səfər zamanı alay yüksək rütbəli komandanlara icra olunan tapşırıq barədə brifinq verib və qiymətləndirmə prosesində olan sistemləri təqdim edib.
Önləyici pilotsuz uçuş aparatları ənənəvi top və bahalı raket sistemlərinə alternativ və ya tamamlayıcı həll kimi önə çıxır. Bu sistemlər hava təhdidlərini birbaşa izləyib zərərsizləşdirərək daha sürətli və maya dəyəri baxımından daha səmərəli müdafiə qatı təqdim etməyi hədəfləyir.
Sevinc Əliyeva
Ordu.az
