Ordu.az xəbər verir ki, bu barədə “Associated Press” (AP) agentliyi məlumat yayıb.
Məlumata görə, ABŞ Prezidenti Donald Tramp hərəkatla qarşıdurmanın Suriya tərəfindən aparılmasını nəzərdə tutan variant təklif edib.
Agentliyin mənbələrinin bildirdiyinə görə, Tramp hesab edib ki, Bəşər Əsədin devrilməsindən sonra hakimiyyətə gələn Əhməd əş-Şaraanın rəhbərlik etdiyi Suriyanın yeni hakimiyyəti “Hizbullah”a qarşı İsraildən daha effektiv mübarizə apara bilər.
Bununla yanaşı, Suriya rəhbərliyi bəyan edib ki, ölkə Livanda hərbi müdaxilədə maraqlı deyil və ABŞ prezidentinin fikirlərinin yanlış şərh edildiyini bildirib.
Bu təşəbbüsün müzakirəsi Livan və İsraildə narahatlıq doğurub. İsrail hakimiyyəti Suriyanın yeni rəhbərliyinə ehtiyatla yanaşır və artıq Suriyanın cənubundakı bəzi ərazilərə nəzarəti əlində saxlayır.
Gərginliyi artıran digər amil isə Türkiyənin Dəməşqə verdiyi dəstəkdir ki, bu da regionda nüfuz uğrunda rəqabəti gücləndirir.
Mənbələrin sözlərinə görə, İsrailin təhlükəsizlik rəhbərliyi Suriya, Livan və İsrail arasında qüvvələr balansında mümkün dəyişikliklərin nəticələrinə həsr olunmuş ayrıca müşavirə keçirib.
Bununla yanaşı, İsraildə əsas təhlükənin hələ də “Hizbullah” olduğu vurğulanır. Məlumata əsasən, Tramp beynəlxalq təmaslar zamanı münaqişənin uzanmasından və mülki əhali arasında böyük itkilərin olmasından narazılığını ifadə edib.
O, Livanın yaşayış məhəllələrinə endirilən genişmiqyaslı zərbələri tənqid edərək, silahlılara qarşı daha dəqiq və hədəfli əməliyyatların keçirilməsinin vacibliyini qeyd edib.
Suriya hakimiyyəti isə öz növbəsində ölkənin daxili bərpasına diqqət yetirmək və regional müharibələrdə birbaşa iştirakdan yayınmaq niyyətində olduğunu bəyan edib.
Dəməşq siyasi nizamlanmanı və Livanda vəziyyətin sabitləşdirilməsini, o cümlədən müxtəlif tərəflərin iştirakı ilə mümkün danışıq formatlarını dəstəklədiyini vurğulayıb.
Yaxın Şərq siyasəti üzrə ekspertlər isə belə təkliflərin həyata keçirilməsinə şübhə ilə yanaşırlar. Onlar Suriyadakı daxili qeyri-sabitliyi, silahlı qüvvələrin parçalanmasını və regiondakı mürəkkəb qüvvələr balansını əsas arqument kimi göstərirlər.
Həmçinin Suriya ilə Livan arasında tarixən mövcud olan gərgin münasibətlər və münaqişədə çoxsaylı xarici aktorların iştirakı fonunda vəziyyətin daha da gərginləşməsi riskinə diqqət çəkilir.
Sevinc Əliyeva
Ordu.az
