Ordu.az xəbər verir ki, bu barədə AFP agentliyi məlumat yayıb.

“Qarşıdakı aylar çətin ola bilər. Bu məsələdə açıq danışmaq istəyirəm. Heç bir hökumət bu müharibənin yaratdığı təzyiqləri tam aradan qaldıra biləcəyinə söz verə bilməz”, - deyə Albanize bildirib.

Benzin qiymətlərinin kəskin artımı fonunda Albanize vətəndaşları ictimai nəqliyyatdan istifadə etməyə çağırıb ki, yanacaq kənd icmaları və həyati əhəmiyyətli xidmətlər üçün qənaətlə istifadə olunsun.

“Avstraliya bu müharibənin birbaşa iştirakçısı deyil. Lakin onun nəticəsində bütün avstraliyalılar daha yüksək qiymətlər ödəyir. Fermerlər, yük maşını sürücüləri, kiçik biznes və ailələr üçün bu dövr asan deyil. Reallıq ondan ibarətdir ki, bu müharibənin yaratdığı iqtisadi sarsıntılar hələ bir neçə ay hiss olunacaq”, - deyə o qeyd edib.

Bu həftə Avstraliya kiçik biznes üçün müvəqqəti vergi güzəştləri tətbiq edib və yanacaq vergisini iki dəfə azaldıb. Bununla hökumət benzin qiymətlərinin artımı ilə üzləşən sürücülərə dəstək göstərib. Bununla yanaşı, yanacaq üzrə məhdudiyyətlərin tətbiqindən imtina edilib.

Coğrafi baxımdan təcrid olunmuş və cəmi iki fəaliyyət göstərən neft emalı zavoduna malik olan Avstraliya qlobal yanacaq təchizatında baş verə biləcək pozuntulara qarşı həssasdır və istehlak etdiyi benzinin böyük hissəsini idxal edir. Hökumət məlumatına görə, ölkənin təxminən 37 günlük benzin ehtiyatı var ki, bu da Beynəlxalq Enerji Agentliyinin müəyyən etdiyi 90 günlük minimum səviyyədən xeyli aşağıdır.

Sevinc Əliyeva
Ordu.az