Ordu.az xəbər verir ki, bu barədə xarici KİV-lər məlumat yayıb.
Bildirilib ki, bu sifariş 2025-ci ildə İsveç Silahlı Qüvvələrinə təhvil verilmiş GAVIA sistemlərinin davamıdır.
Göteborqda keçirilən “Navy Tech” konfransı çərçivəsində imzalanan müqavilə yeni sistemlərin əməliyyat çevikliyini və ümumi imkanları artırmağa yönəlib.
GAVIA platformaları hazırda mina əleyhinə tədbirlər, partlayıcı sursatların zərərsizləşdirilməsi, sualtı kəşfiyyat və inspeksiya kimi missiyalarda aktiv istifadə olunur. Bundan əlavə, sistemlər kritik sualtı infrastrukturun monitorinqi üçün də uyğunlaşdırıla bilir.
Platformanın modul quruluşu müxtəlif tapşırıqlara uyğun sürətli yenidən konfiqurasiyaya imkan verir, bu isə logistika yükünü azaldaraq əməliyyat effektivliyini qorumağa kömək edir.
Şirkət nümayəndəsi Stefan Reynisson bildirib: “İsveç Müdafiə Materialları İdarəsi və Silahlı Qüvvələrinin bizə göstərdiyi etimadı yüksək qiymətləndiririk. Bu sifariş GAVIA platformasının modul quruluşunun və real əməliyyat şəraitindəki effektivliyinin göstəricisidir”.
Qeyd olunur ki, bu tədarük İsveçin çoxillik dəniz modernizasiya proqramının bir hissəsidir və sualtı müşahidə və əməliyyat imkanlarının gücləndirilməsinə xidmət edir.
Sevinc Əliyeva
Ordu.az
