Ordu.az xəbər verir ki, bu barədə “Armenianweekly.com” nəşri “İranda və Livanda erməni məhəllələri zərbələrə məruz qalıb, Paşinyan müharibənin TRIPP (Zəngəzur dəhlizi-red.) layihəsini ləngidə biləcəyini bildirib” başlıqlı məqaləsində yazıb.
Nəşr qeyd edib ki, bu arada ABŞ və İsrail müharibəni dayandırmaq niyyətində olmadıqlarını göstərir. Tehran meri son günlər Vaşinqton və Təl-Əviv tərəfindən 9000-dən çox hədəfin vurulduğunu bildirib.
“ABŞ Hörmüz boğazının bağlanması nəticəsində artan enerji qiymətlərini sabitləşdirmək üçün strateji ehtiyatlarından 172 milyon barel neft buraxdığını açıqlayıb.
BMT Təhlükəsizlik Şurasında vəziyyət gərgin olaraq qalır. İranın qonşu ölkələrə, xüsusilə Körfəz regionuna zərbələrindən sonra Şura İranın hücumlarını pisləyən qətnamə layihəsini qəbul edib.
Qətnaməni Təhlükəsizlik Şurasının 15 üzvündən 13-ü dəstəkləyib və Baş Assambleyada 135 dövlət tərəfindən dəstək alıb. Rusiya və Çin səsvermədə bitərəf qalıb və veto hüququndan istifadə etməyib”, - deyə KİV bildirib.
Müəllif yazıb ki, Qafqaz regionunda vəziyyət sabit olaraq qalır. Ermənistan Xarici İşlər Nazirliyinin məlumatına görə, müharibə başlayandan bəri erməni vətəndaşları arasında itki qeydə alınmayıb.
“Martın 10-da nazirlik bildirib ki, ikinci erməni vətəndaşı martın 16-na qədər İrandan Ermənistana qayıdacaq. Bundan əlavə, 46 ölkənin vətəndaşları müharibə zonasını Ermənistan vasitəsilə tərk edib.
Avropa Parlamentinin prezidenti Roberta Metsola martın 11-də Ermənistanın humanitar dəhliz rolunu yenidən vurğulayıb və Avropa vətəndaşlarının təxliyəsinə göstərdiyi yardıma görə ölkəyə təşəkkür edib.
Son bir həftə ərzində Ermənistan vasitəsilə 550 hindistanlı, nigeriyalı və İranda atom elektrik stansiyalarında çalışan 150 rusiyalı əməkdaş təxliyə olunub”, - deyə məqalədə qeyd edilib.
KİV vurğulayıb ki, martın 14-də isə Maskatdan gələn reyslə 46 sərnişin arasında olan 10 erməni vətəndaşı İrəvana təhlükəsiz şəkildə qayıdıb.
“Bu arada İranın Ermənistandakı səfiri Xəlil Şirğolami bildirib: “Xoşbəxtlikdən iqtisadi əməkdaşlıq davam edir. Sərhədimiz həm sərnişin, həm də yük daşımaları üçün açıqdır”. O əlavə edib: “Ermənistanla qarşılıqlı etimada əsaslanan dost münasibətlərimiz var. Biz həmişə vurğulamışıq ki, Ermənistanın təhlükəsizliyi bizim də təhlükəsizliyimizdir”.
Ermənistanın Baş naziri Nikol Paşinyan isə Yaxın Şərqdəki böhranla bağlı narahatlığını ifadə edib və bildirib ki, İran müharibəsi TRIPP layihəsinin həyata keçirilməsini ləngidir”, - deyə nəşr bildirib.
Müəllifin sözlərinə görə, təhlükəsizlik baxımından isə regiondakı erməni icmalarının vəziyyəti hələ də həssas olaraq qalır.
“Tehranın ermənilərin yaşadığı məhəlləsində yerləşən yaşayış binası ABŞ və İsrailin hücumu nəticəsində zədələnib, lakin itki qeydə alınmayıb.
Livanda isə İsrailin hava zərbəsi ermənilərin sıx yaşadığı Burc Hammud bələdiyyəsinin Nəbəa qəsəbəsini hədəf alıb. Hücum nəticəsində azı bir nəfər ölüb, lakin ermənilər arasında itki qeydə alınmayıb.
Kilikiya Böyük Evinin katolikosu I Aram bildirib ki, o, regiondakı hadisələri yaxından izləyir və Körfəz ölkələrində, İranda və Livanda yaşayan erməni icmalarının təhlükəsizliyini təmin etmək üçün tədbirlər görür. O, müharibənin tezliklə başa çatacağına ümid etdiyini də qeyd edib”, - deyə KİV bildirib.
Alpər Mövludoğlu
Ordu.az
