Ordu.az xəbər verir ki, bunu Ermənistanın “Voskanapat” analitik mərkəzinin rəhbəri, erməni ekspert Hrant Melik-Şahnazaryan deyib.
Onun sözlərinə görə, texniki detallar bu günə qədər tam açıqlanmır, ümumi ifadələrlə kifayətlənirlər və s., lakin alt mətnində hamı başa düşür ki, bu, Ermənistan ərazisindən Azərbaycana verilən dəhlizdir.
“Texniki tərəfə gəlincə, mənim anladığım və Vensin regional səfərinə əsasən demək olar ki, yolun işə salınması iki amildən asılıdır. Birinci amil Ermənistanda Nikol Paşinyanın hakimiyyətinin qorunub saxlanılması, ikinci amil isə investisiyaların cəlb olunmasıdır. ABŞ açıq şəkildə investisiya yatırmaq istəmir, o, yalnız yolun nəzarətindən əldə ediləcək siyasi təsiri qazanmaq niyyətindədir, investisiyaları isə Azərbaycan tərəfinin üzərinə qoymaq istəyir. Azərbaycan bundan imtina etmir, sadəcə birinci məsələyə, yəni Nikol Paşinyanın hakimiyyətinin qorunmasına zərər vurmamaq üçün həmin investisiyaları müxtəlif beynəlxalq təşkilatların vasitəçiliyi ilə həyata keçirməyə çalışır və proses belə davam edəcək. Yəni bu iki məsələ indiki kimi davam edərsə, dəhliz çox yaxın zamanda işə düşəcək və Azərbaycan Ermənistan ərazisi vasitəsilə Türkiyə ilə maneəsiz əlaqə əldə edəcək”, - deyə Şahnazaryan bildirib.
O vurğulayıb ki, yolun işə salınması ilə bağlı heç bir narahatlıq aradan qalxmayıb. “Əksinə, bu narahatlıqlar daha da konkretləşib. Vens Ermənistanda regional şirkətlərin və qüvvələrin investisiya yatırmağa hazır olduqlarını gizlətmirdi. Regionda İran və Rusiya bu dəhlizin istismarına qarşıdır, Ermənistanda isə belə investisiya yatıracaq tərəf yoxdur, qalır Türkiyə və Azərbaycan. Azərbaycanın müxtəlif dövlət fondlarının, məsələn, “BlackRock” kimi investisiya şirkəti ilə əməkdaşlığa başlamasını nəzərə aldıqda, hansı mexanizmlərin işə salınacağı aydın olur. Ermənistanda bu vəsaitləri Azərbaycan yatıracaq, əsas benefisiar Azərbaycan olacaq, ABŞ isə regionda geosiyasi və geoiqtisadi mövcudluq üçün legitim əsaslar əldə edəcək ki, müəyyən məsələləri diktə edə bilsin və s. Ermənistan isə tranzit dəhliz olmaqdan əldə olunan gəlirin 25 faizini alacaq, üstəlik, həmin təşkilatın nə qədər vəsait götürəcəyi, ümumiyyətlə gəlir qalıb-qalmayacağı da hələ məlum deyil”, - deyə Şahnazaryan qeyd edib.
Onun sözlərinə görə, bütün bunlar Rusiyanı regiondan tamamilə sıxışdırıb çıxarmaq məqsədi daşıyır.
Erməni ekspertin qiymətəndirməsinə görə, Nikol Paşinyan Rusiyaya təklif etmişdi ki, Ermənistan dəmir yolları üzrə konsessiya hüququnu Moskva və İrəvana dost olan bir dövlətə satsın.
“Bu da növbəti siqnallardan biridir. Aydındır ki, hazırkı hakimiyyət ardıcıl şəkildə hər şeyi edir ki, Rusiyanın regiondakı təsiri və mövcudluğu azalsın, Rusiya Ermənistanda mövqelərini itirsin. Bu, həm də Qərb ölkələrinin və qurumlarının rəhbərlərinin açıq şəkildə danışdıqları diktə olunmuş siyasətdir, yəni Rusiyanı regiondan çıxarmaq lazımdır, bu, onlar üçün elan olunmuş məqsəddir. Paşinyan da bu istiqamətdə addımları sakit şəkildə atır və irəliləyir. Proses əslində çox açıqdır, məqsədlər o qədər açıqdır ki, texniki məsələlərin həllinə, insanları çaşdırmağa belə vaxt sərf olunmur. İndi bunları Ermənistana çəkidarlıq qazandıran, gəlir gətirən, ölkəni “sülh kəsişməsi”nə çevirən layihə kimi təqdim edirlər. Amma reallıqda TRIPP regionun kəsişmə nöqtəsinə Ermənistanı deyil, Azərbaycanı çevirir. Çünki qərbə, şimala və cənuba gedən bütün marşrutlar Azərbaycandan başlayır. Ermənistan ərazisi vasitəsilə isə əvvəllər bu imkan yox idi, indi həmin imkan da açılıb. Beləliklə, kəsişmə nöqtəsi Azərbaycan oldu, Ermənistan yox”, - deyə o qeyd edib.
Şahnazaryan kilsə məsələsinə toxunaraq vurğulayıb ki, Paşinyanın kilsə ilə bağlı siyasəti ardıcıldır, o, bu məsələdə tələsməyə ehtiyac duymur.
“Əksinə, zaman-zaman müəyyən “uğurlar” əldə etmək prosesi davam edərsə, bunu uzatmaq istəyəcək. Çünki ona özünü təsdiqləmək üçün obyektlər, qüvvələr lazımdır: onların hesabına özünü güclü göstərmək, qalib gəldiyini nümayiş etdirmək və s. Bu baxımdan hakimiyyət kilsə faktorundan da belə istifadə edir. Bu isə o demək deyil ki, son məqsəd kilsəni parçalamaq və ya öz iradəsinə tabe etdirmək deyil. Son vaxtlar müşahidə edirəm ki, bu, təkcə Ermənistana xas tendensiya deyil. Postsovet ölkələrində də kilsəyə qarşı kampaniyalar aparılır. Ukraynada faktiki olaraq kilsə parçalandı, Ukrayna kilsəsi Rus Pravoslav Kilsəsinin nəzarətindən çıxarıldı, ayrıca patriarxlıq yaradıldı və s., lakin daxili qarşıdurma davam edir. Eyni proses hazırda Moldovada da gedir. Ümumiyyətlə, bu, dövrümüzdə müxtəlif ölkələrdə populist hakimiyyətlərə xas xüsusiyyətdir. Bu, ənənəvi dəyərləri təmsil edən institutlara qarşı mübarizədir. Ermənistan da bu baxımdan istisna deyil”, - deyə Ermənistanın “Voskanapat” analitik mərkəzinin rəhbəri vurğulayıb.
O, seçki məsələsinə toxunaraq bildirib ki, əvvəlki metodlar yenə də işləyir.
“Düşünmürəm ki, əvvəlki metodlar artıq işləmir. Görürük ki, keçmiş hakimiyyət nümayəndələrinə qarşı yenidən cinayət işləri açılır, yeni əmlak müsadirəsi prosesləri başlayır və s. Bu, hakimiyyətə müəyyən faiz qazandıracaq. Hətta üç-beş faiz olsa belə, onlar həmin faizlərin dalınca gedəcəklər. Məcburdurlar ki, bütün mümkün səsləri toplasınlar, çünki həqiqətən problem yaşayırlar. Amma əsas vurğu nə korrupsiyaya qarşı mübarizədir, nə də vədlərdir. Çünki korrupsiya məsələsində özləri, yumşaq desək, əvvəlkilərdən daha uzağa gediblər. Onların əsas məqsədi və üsulu cəmiyyəti müharibə ilə qorxutmaq olacaq. Azərbaycanla əməkdaşlıq edərək, sülh təbliğatı apararaq müəyyən nəticə əldə etməyə çalışacaqlar. Əgər söhbət sırf səs toplamaqdan gedirsə, bu, əsas üsullardan biridir.
Lakin mən aylar əvvəl demişdim ki, 2026-cı ildə gözlənilən seçkilər artıq saxtalaşdırılıb. Bunu ən azı ondan görmək olar ki, müxalifətin bütün liderləri cinayət təqibinə məruz qalır, bir çoxu həbs olunub, bəziləri ev dustaqlığındadır, digərlərinə qarşı cinayət işləri var və faktiki olaraq müxalifətin ikinci, üçüncü eşelonu da təqib olunur. Son vaxtlar Üçmüədzində baş verənlər bunun bariz sübutudur. Hakimiyyət müxalifətə işləyə, səs toplaya biləcək hər kəsə qarşı cinayət işləri açır. Cinayət maddələri ilə hədələyərək onları zərərsizləşdirir, müxalifətin normal seçki kampaniyası aparmasına imkan vermir. Hakimiyyət kampaniya aparıb müxtəlif proqramlar təqdim etdiyi halda, eyni zamanda müxalifət liderləri məhkəmələrdə müxtəlif iclaslarda iştirak etməyə məcbur qalırlar”, - deyə Şahnazaryan sözlərini yekunlaşdırıb.
Alpər Mövludoğlu
Ordu.az
