Ordu.az xəbər verir ki, Ermənistanın “Zartonk” qəzetinin baş redaktoru Sevak Hakopyan bu cür bəyanatın özünün seçki prosesinə müdaxilə olduğunu deyib.

“Qərb üçün bir vərdiş var: Qərb nə edirsə, bu, yaxşı və düzgündür, amma eyni şeyi başqa tərəf etsə, bu, çox pis və antidemokratik sayılır. Qərb istənilən ölkənin suverenliyini poza, hücum edə, müdaxilə edə bilər, bütün bunlar normal qəbul olunur. Bu dəstək və açıq mətn 2018-ci ildə nə baş verdiyini və bu insanların niyə hakimiyyətdə olduqlarını daha aydın göstərir”, - deyə o bildirib.

Hakopyanın qiymətləndirməsinə görə, 2018-ci ildə tətbiq olunan texnologiyalardan açıq-aydın görünürdü ki, burada erməniyə məxsus heç nə yoxdur.

“Aydın idi ki, bu, nə rus, nə də şərq mənşəlidir, qərb mənşəlidir. Biz ərəb baharını görmüşdük və baş verənlər ərəb baharının və ya rəngli inqilabların təkrarı idi. Aydın idi ki, necə təşkil olunub, hara gedəcək və hara çatdıracaq. Yeganə təəssüfüm odur ki, o zaman bu səviyyəyə çatacağımızı təsəvvür edə bilmirdim”, - deyə o vurğulayıb.

Hakopyan, həmçinin Erməni Apostol Kilsəsinə qarşı mübarizəni Qərblə əlaqələndirib və bunun Qərb-Şərq qarşıdurması olduğunu vurğulayıb: “Bu məntiqə əsasən, qərbyönlü hakimiyyət tərəfi təbii ki, bütün ermənilərin katolikosunu ziyarət etməli və ya Üçmüədzin kilsəsinə getməli deyildi”.

“Yəni Nikol Paşinyanın kilsəyə qarşı kampaniyanı daha da gücləndirməsi üçün “yaşıl işıq” Qərbdəndir?” sualına o, belə cavab verib:

“Bu qədər ardıcıl, aqressiv və barışmaz kampaniyanı başqa cür izah edə bilmirəm. Bu mənfi qətiyyət göstərir ki, söhbət təkcə şəxsi məsələ və ya səmimi islahat niyyətindən yox, öhdəlik götürmüş tərəfin davranışından gedir. Qərb kilsələrindən fərqli olaraq, şərq kilsələri milli xarakter daşıyır və əgər həmin xalqlara zərbə vurulmalıdırsa, milli ruha zərbə endirilməlidir. Şərq xalqlarında milli ruhu yüksək saxlayan ən mühüm institut kilsədir. Məhz həmin kilsələr neytrallaşdırılarsa, o xalqı diz çökdürmək daha asan olar”.

Onun sözlərinə görə, Vensin dəstəyi hakimiyyət üçün gördüklərini daha da sərtləşdirmək və ya üzərlərinə götürdükləri öhdəlikləri yerinə yetirmək baxımından “yaşıl işıqdır”.

“Bu mənada mən də narahatam, amma hər şey xalqımızdan asılıdır. Əgər xalq daha ayıq olsa, bu cür proqram haradan gəlməsindən asılı olmayaraq, iflasa uğrayacaq. Belə nümunələr çoxdur. Bir çox xalqlar bu cür müdaxilələrə müqavimət göstərib və qalib gəliblər”, - deyə Hakopyan bildirib.

Alpər Mövludoğlu
Ordu.az