Ordu.az xəbər verir ki, bunu Türkiyə prezidenti Rəcəb Tayyib Ərdoğan Nazirlər Kabinetinin iclasından sonra verdiyi açıqlamada deyib.

“Biz əvvəldən İranın nüvə proqramı ilə bağlı müzakirələrin danışıqlar masası arxasında aparılmalı olduğunu iddia etmişik və bu gün də eyni nöqtədəyik. Cümə günündən etibarən həm mən, həm də xarici işlər naziri münaqişələri dayandırmaq üçün sıx diplomatik hərəkət edirik. Bütün həmsöhbətlərimizə açıq şəkildə çatdırdıq ki, biz Türkiyə olaraq asanlaşdırma da daxil olmaqla, lazım olan hər şeyi etməyə hazırıq. Bölgəmizdə həqiqəti görmədən atılan hər addım başqa fəlakətlərə gətirib çıxaracaq. Bu fəlakətlər adətən zalımların aradan qaldırılması ilə nəticələnir”, - deyə Ərdoğan qeyd edib.

Türkiyə prezidenti ölkənin çəkindirmə gücünə də toxunub: “Əgər siyasi, sosial, iqtisadi və ya hərbi cəhətdən güclü deyilsinizsə, özünüzü təmin edə bilmirsinizsə və çəkindirmə səviyyəsinə çatmamısınızsa, işiniz çox çətindir. Son inkişaflar fonunda orta və uzun mənzilli raket ehtiyatlarımızı çəkindirici səviyyəyə çatdıracaq istehsal planları hazırlayırıq. Qısa müddət ərzində biz heç kimin bizə meydan oxumağa cəsarət etməyəcəyi müdafiə qabiliyyəti səviyyəsinə çatacağıq. İnventarımızdakı məhsulları çəkindirməmizi dəstəkləyəcək şəkildə və miqdarda istehsal etmə mərhələsinə gəldik.

İnşallah, ölkəmizi bölgəmizdəki böhranların mənfi təsirlərindən uzaq tutacağıq. İqtidarımız və ittifaqımız bölgəmizin içərisindəki olduğu bu ağrılı dövrdə Türkiyənin müstəqilliyinin, gələcəyinin təməli və təminatıdır. 86 milyon insanın etibarı etibarlı əllərdədir. Allahın izni ilə Türk Əsrinin qurulmasına heç kim mane ola bilməz. Bu gün məsuliyyətli siyasət günüdür. Türkiyə dövlət zəkası və köklü təcrübəsi ilə hadisələri oxuyur, sağlam düşüncə və soyuqqanlılıqla dəyərləndirir”.

Sevinc Əliyeva
Ordu.az