Makron-Ərdoğanın yeni telefon danışığı müəyyən “üçbucaq” fonunda diqqət çəkir. Xüsusilə, Ərdoğan bir neçə gün əvvəl Suriyanın yeni prezidenti Əhməd əş-Şəraanı qəbul edib və onunla Türkiyənin Suriyadakı hərbi mövcudluğu məsələlərini də müzakirə edib. Şəraanın Ərdoğanla görüşündən bir gün sonra Makron Dəməşqə zəng edərək, Suriya prezidenti ilə söhbət edib.

Budur, bu söhbətdən iki-üç gün sonra Ərdoğan-Makron telefon danışığı baş tutur. Telefon danışığı zamanı onlar həm ikitərəfli, həm də regional məsələləri, xüsusilə Suriya ilə bağlı məsələləri, həmçinin İsraillə HƏMAS arasında atəşkəsin qorunmasının vacibliyini müzakirə edirlər.

Fransa Türkiyəni Yaxın Şərqdə tərəfdaş kimi qəbul etməyə başlayacaqmı, bu yolla Yaxın Şərq status-kvosu uğrunda mübarizənin yeni raundunda öz həyat qabiliyyətini qoruya biləcəyinə inanacaqmı? ABŞ prezidenti Donald Trampın andiçmə mərasimi, eləcə də Rusiya ilə İran arasında imzalanmış yeni hərtərəfli strateji tərəfdaşlıq sazişi ilə bəlkə də yeni dövr başlayır.

Təbii ki, Fransa-Türkiyə ortaqlığından və ya müttəfiqliyindən danışmaq mübaliğədir, lakin onların ortaqlığının Yaxın Şərqdə formalaşması kifayət qədər nəzərə çarpır. Əlbəttə, Fransanın “alternativ” imkanlar istiqamətində çalışmayacağını düşünmək də sadəlövhlük olar. Nəticə etibarilə taktiki təmaslarla üzləşdiyimiz aydındır.

Bunların nə qədər davam edəcəyi, oyunun nə qədər genişlənəcəyi bəlli deyil, amma əsas sual yaranan bu tərəfdaşlığın Qafqaz məsələsinə necə təsir edə biləcəyidir. Burada Fransa-Türkiyə baxışlarının müəyyən ümumiliyi formalaşacaqmı? Bu sualın cavabı, təbii ki, hələ də uzaqda ola bilər, çünki bu, Yaxın Şərqdəki vəziyyətdən asılıdır.

Bu isə yeni dövrdə hələ yeni impuls toplayır. Nəticə etibarilə heç kim Fransa-Türkiyə ekzistensial rəqabətini “ləğv etməyib”.

Asif Cəfərov
Ordu.az