Ordu.az xəbər verir ki, Yunanıstan parlamentinin silahlanma komitəsi 33 milyon avroya 16 ədəd “Exocet MM40 Block 3C” gəmi əleyhinə raketinin alınmasını təsdiqləyib.

Raketlər Yunanıstan HDQ-nin inventarına daxil ediləcək və müxtəlif platformalarda istifadə olunacaq. Bundan əlavə, Yunanıstanın Fransadan aldığı və tədarükünün 2026-cı ildə başlaması planlaşdırılan “Belharra” sinfinə məxsus freqatlarda “Exocet Block 3C” raketlərindən istifadə olunacaq.

Parlament komitəsi, həmçinin patrul/müşahidə məqsədləri üçün istifadə edilən köhnə qayıqları əvəz etmək məqsədilə 3 ədəd “Marine Protector” patrul gəmisinin tədarükü ilə bağlı 15 milyon avroluq proqramı təsdiqləyib.

ABŞ-dən alınacaq bu qayıqların daşınması və modernləşdirilməsi xərcləri də daxil olmaqla, hər gəmi təxminən 5 milyon avroya başa gələcək.

Fransanın tərəfdaşlarından biri olduğu, Avropada yerləşən MBDA şirkətinin istehsal etdiyi “Exocet Block 3C” raketləri 200 km-lik mənzilə malikdir. Əvvəlki model “Block 2”nin 70 km mənzilindən üç dəfə çox olan bu mənzil raketin uzaq məsafələrdəki hədəfləri vurmasına şərait yaradır.

Sevinc Əliyeva
Ordu.az