Ordu.az xəbər verir ki, Türkiyə Müdafiə Sənayesi Komitəsinin (MSK) sədri Haluk Görgün sosial media hesabından verdiyi açıqlamada Türkiyənin müdafiə sənayesində müstəqillik və müttəfiq ölkələrlə əməkdaşlıq hədəfini vurğulayıb.

Görgün açıqlamasında qeyd edib:

“Biz müdafiə sənayesində müttəfiqlərimizlə əməkdaşlığımızı gücləndirməyə və milli, yerli texnologiyalarımızı dost ölkələrlə bölüşməyə davam edirik. Bu gün müdafiə sənayesində tarixi addımlarımızdan birinin şahidi olmaqdan qürur duyuruq. Bu mühüm razılaşma Türkiyənin müstəqil texnologiyaları inkişaf etdirmək məqsədinin göstəricisi olmaqla yanaşı, dost və müttəfiq ölkələrlə güclü əməkdaşlığın nişanıdır.

Uğurla dolu bu prosesdə əməyi olan bütün MSK birliklərimizi, TUSAŞ-ın dəyərli komandasını, Madriddəki səfirimizi və mərasimdə iştirak edən Türkiyə Silahlı Qüvvələri attaşemizi ürəkdən təbrik edirəm. Türkiyə uzaqgörən liderliyin rəhbərliyi altında dünya miqyasında müdafiə sənayesindəki gücünü möhkəmləndirməyə davam edəcək. Ümid edirəm ki, bu müqavilə faydalı olacaq”.

Sevinc Əliyeva
Ordu.az