Ordu.az xəbər verir ki, Rumıniya ABŞ hökuməti tərəfindən Xarici Hərbi Satış (FMS) çərçivəsində “Lockheed Martin”dən 32 ədəd F-35 “Lightning II” döyüş təyyarəsi almaq niyyətini rəsmən təsdiqləyib.

Tədarük təxminən 6,4 milyard dollar dəyərindədir.

“Lockheed Martin” tərəfindən verilən açıqlamada qeyd edilib: “Bu qərar Rumıniyanın müdafiə strategiyasında güclü və qabaqcıl hərbi qüvvəni saxlamaq öhdəliyində mühüm mərhələdir”.

Rumıniya platformanın Belçika, Çexiya, Danimarka, Finlandiya, İtaliya, Niderland, Polşa və Böyük Britaniyanın da daxil olduğu böyük Avropa müştəri bazasına qoşulur.

ABŞ-nin Rumıniyadakı səfiri Ketlin Kavalek Buxarestdə imzalanma mərasimində jurnalistlərə verdiyi açıqlamada bu təyyarələrin 2030-cu ilə qədər Rumıniya üzərində uçacağını gözlədiyini bildirib.

Sənədi Rumıniyanın müdafiə naziri Anxel Tilvar və Kavalek imzalayıblar.

Sevinc Əliyeva
Ordu.az