Bu barədə Ordu.az-a açıqlamasında mərkəzin Baş həkimi Kamandar Rəhimov məlumat verib.

Onun sözlərinə görə, hazırda müayinə prosesi davam etdirilir və onun sağlamlığı kafi olaraq dəyərləndirilir.

"Artıq həyati təhlükənin olmadığına əmin olduqdan sonra Elvini evə buraxmağa icazə verəcəyik", - deyə o əlavə edib.

Elvin İbrahimovun anası Qərənfil İbrahimova isə oğlunun arıqladığını və saçlarının uzandığını bildirib.

"Onu iki saat öncə gördüm. Təxminən 10 dəqiqə ərzində görüşdük. Oğlum övladı ilə də görüşdü. Cənab Ali Baş Komandana və dəyişmə prosesinin təşkilatçılarına minnətdarlığımı bildirirəm", - deyə Q. İbrahimova sevincək qeyd edib.

Qeyd edək ki, Əsir və itkin düşmüş, girov götürülmüş vətəndaşlarla əlaqədar Dövlət Komissiyası tərəfindən Beynəlxalq Qızıl Xaç Komitəsinin vasitəçiliyi ilə aparılmış danışıqlar nəticəsində əldə edilmiş razılığa əsasən, 16 mart 2019-cu il tarixdə Ermənistan hərbçiləri tərəfindən girov götürülən Azərbaycan vətəndaşı, Qazax rayonu, Yuxarı Salahlı kənd sakini, 29.10.1986-cı il təvəllüdlü İbrahimov Elvin Arif oğlu və 20 iyun 2017-ci il tarixdə Qazax rayonu ərazisində saxlanılmış Ermənistan Respublikasının vətəndaşı, 06.11.1974-cü il təvəllüdlü Karapetyan Zaven Avanesoviç 28 iyun 2019-cu il tarixdə müvafiq olaraq tərəflərə təhvil veriliblər.







Cümşüd Məmmədov
Ordu.az