Ordu.az xəbər verir ki, bu barədə Merts Bundestaqda hökumət bəyanatı ilə çıxışı zamanı danışıb.

Kansler bildirib ki, bu il Avropada növbəti onillik ərzində Avropa vəsaitlərinin hansı istiqamətlərə yönəldiləcəyinə dair aydınlıq yaradılacağına ümid edir.

“20-ci əsrin büdcəsi ilə 21-ci əsrin çağırışlarına cavab verə bilməyəcəyimiz aydındır. Buna görə də Avropa büdcəsinin əsaslı şəkildə yenidən qurulması sadəcə zərurətdir”, - deyə Merts vurğulayıb.

Bununla yanaşı, o, suverenliyin təmin edilməsi, rəqabət qabiliyyətinin artırılması və müdafiə sahəsində birgə investisiyaların həyata keçirilməsi üçün ümumi maliyyə resurslarından istifadənin tərəfdarı olduğunu bildirib.

Merts qeyd edib ki, məhz bu istiqamətlər hazırda prioritet kimi müəyyən edilməlidir və buna görə də müzakirə olunan mövcud təkliflərlə müqayisədə bütün sahələr üzrə ciddi dəyişikliklərə ehtiyac var.

Almaniya Kanslerinin sözlərinə görə, Avropanın bir çox ölkəsində dövlət büdcələrinin konsolidasiyası istiqamətində çox sərt tədbirlər həyata keçirilir.

“Ölkəmizin və qitəmizin vətəndaşları haqlı olaraq Brüsseldən də xərclər və işçi heyəti məsələsində ölçü hissi gözləyirlər. Bu kontekstdə bildirmək istəyirəm ki, yeni Avropa borcları çıxış yolu deyil”, - deyə Merts vurğulayıb.

O qeyd edib ki, həddindən artıq borclanma dövlətlərin suverenliyini təhlükə altına salır və onların manevr imkanlarını məhdudlaşdırır.

“Bəzi ölkələr artıq bu gün nəhəng borcları səbəbindən müdafiəyə ayırdıqlarından daha çox vəsaiti faiz ödənişlərinə xərcləyirlər. Biz Avropa büdcəsini belə vəziyyətə gətirməməliyik. Müstəqil, fəaliyyət qabiliyyətli və bir sözlə, suveren qalmalıyıq, o cümlədən gələcək böhran vəziyyətlərində belə olmalıdır”, - deyə Almaniya Kansleri yekunlaşdırıb.

Sevinc Əliyeva
Ordu.az