Ordu.az CENTCOM-un yaydığı məlumata istinadən xəbər verir ki, hadisə ABŞ hərbçilərinin Hörmüz boğazı istiqamətində hərəkət edən İran kamikadze pilotsuz uçuş aparatlarını vurmasından və İranın radiolokasiya obyektlərinə zərbələr endirməsindən cəmi bir neçə saat sonra baş verib.

Komandanlığın bəyanatında bildirilir ki, ilkin qiymətləndirmələrə əsasən, İran tərəfindən buraxılan yeddi raketdən altısı havada məhv edilib. Yeddinci raket isə nəzərdə tutulan hədəfə çatmayıb.

CENTCOM qeyd edib ki, hazırkı məlumata görə, ABŞ hərbçiləri arasında itki və ya yaralanan yoxdur.

Komandanlıq həmçinin İran tərəfinin Bəhreyndə yerləşən ABŞ Hərbi Dəniz Qüvvələrinin Beşinci Donanmasının qərargahına zərbə endirilməsi ilə bağlı açıqlamalarını təkzib edib.

“Bəhreyndə ABŞ Beşinci Donanmasının qərargahına zərər vurulması ilə bağlı İranın iddiaları həqiqətə uyğun deyil”, - deyə CENTCOM-un açıqlamasında bildirilib.

Sevinc Əliyeva
Ordu.az