Ordu.az xəbər verir ki, bu barədə rusiyalı təbliğatçı Romanov Lite məlumat yayıb.
Onun sözlərinə görə, yanacaq bəzi yanacaqdoldurma məntəqələrində vaxtaşırı satışa çıxarılsa da, çox qısa müddətdə tükənir. O bildirib ki, Donetsk-Avilo-Uspenka avtomobil yolu boyunca yanacaq olan heç bir məntəqə tapmaq mümkün deyil. Oxşar vəziyyət işğal altındakı Donetsk şəhərində də müşahidə olunur.
Romanov həmçinin qeyd edib ki, Rusiya hərbçiləri Rostov vilayətindəki yanacaqdoldurma məntəqələrində də yanacaq ala bilməyiblər. Onun sözlərinə görə, hətta Rusiya ərazisində belə onlara kanistrlərə yanacaq doldurmağa icazə verilməyib.
Romanovun yaydığı videoda bir nəfərin yanacaqdoldurma məntəqəsinin əməkdaşlarını ona yanacaq satmağa razı salmağa çalışdığı görünür. İşçilər isə təhlükəsizlik qaydalarına əsasən kanistrlərə yanacaq doldurulmasının qadağan olduğunu bildirirlər. Bununla belə, 60 litrədək tutuma malik kanistrlərə icazə verildiyi qeyd olunur.
Ukrayna qüvvələri uzun müddətdir ki, Rusiyanın hərbi imkanlarının əsas komponentlərindən biri hesab edilən yanacaq təminatını hədəfə alaraq neft bazalarına və digər yanacaq infrastruktur obyektlərinə zərbələr endirir.
Rusiya ordusu hərbi texnikanı gizlətmək üçün mülki nəqliyyat vasitələrindən istifadə təcrübəsinə malikdir.
Eyni zamanda bu üsulun yanacaq daşınmasında da tətbiqi logistika sistemində xüsusi zəifliklərin və yanacaq təchizat zəncirində itkilərlə bağlı narahatlıqların mövcudluğuna işarə edə bilər.
Yanacaq daşıyan avtomobillər cəbhədə ən vacib logistika vasitələrindən biri hesab olunur. Onların məhv edilməsi və ya zədələnməsi nəqliyyat vasitələrinin hərəkətinə, generatorların fəaliyyətinə və bölmələrin döyüş əməliyyatlarını tələb olunan tempdə davam etdirməsinə birbaşa təsir göstərir.
Yanacaq daşıyan maşınlara, neft bazalarına və yanacaq anbarlarına müntəzəm zərbələr nəticəsində yanacaq təchizatı problemləri təkcə Ukraynanın işğal olunmuş ərazilərində deyil, Rusiyanın sərhədyanı bölgələrində də yaranıb.
Belə hücumlar nəticəsində itkilərin qarşısını almaq üçün Rusiya qüvvələri yanacaq daşıyan avtomobilləri mülki yük maşınları kimi maskalayır, bəzi hallarda isə yanacağın daşınması üçün mülki nəqliyyat vasitələrindən istifadə edirlər.
Sevinc Əliyeva
Ordu.az
