Ordu.az xəbər verir ki, bu barədə “Tasnim” agentliyi məlumat yayıb.

Komandan bildirib ki, ABŞ-nin İrana qarşı təkrar hərbi zərbələri münaqişənin region sərhədlərindən kənara çıxmasına və beynəlxalq təhlükəsizliklə qlobal iqtisadiyyata təsir göstərən daha geniş qarşıdurmaya çevrilməsinə səbəb ola bilər.

Onun sözlərinə görə, Vaşinqton bir tərəfdən danışıqlardan və mümkün razılaşmalardan danışır, digər tərəfdən isə düşmən xarakterli addımlar atmağa davam edir. İran tərəfi hesab edir ki, bu yanaşma regiondakı qeyri-sabitliyin əsas səbəblərindən biridir və xüsusilə Hörmüz boğazında beynəlxalq ticarət üçün təhdid yaradır.

Komandan vurğulayıb ki, ABŞ yenidən İrana zərbə endirərsə, əvvəlkindən daha sərt cavabla qarşılaşacaq.

O əlavə edib ki, müharibənin alovlanması yalnız regionda qeyri-sabitliyi artırmayacaq, həm də daha geniş coğrafiyaya yayılacaq.

“Xatəm əl-Ənbiya” qərargahının rəhbəri həmçinin bildirib ki, İran cəmiyyətinin və silahlı qüvvələrinin imkanları Vaşinqton tərəfindən düzgün qiymətləndirilmir.

Komandan qeyd edib ki, İranın neft infrastrukturuna qarşı təhdidlər fonunda əsas prinsip dəyişməz qalır: ya bütün tərəflər neft və qaz ixracını maneəsiz həyata keçirəcək, ya da bu imkan heç kim üçün mövcud olmayacaq.

Sevinc Əliyeva
Ordu.az