Ordu.az xəbər verir ki, bu barədə CNN telekanalı ABŞ rəsmilərinə istinadən məlumat yayıb.

Məlumata görə, Vaşinqton tərəflər arasında mübahisələrin yaxın zamanda həll olunacağına dair ehtiyatlı nikbinliyini qoruyur. Vasitəçilər üçün müsbət siqnal kimi İran nümayəndə heyətinin bazar ertəsi Qətərə gəlməsi qiymətləndirilib.

Bildirilir ki, nümayəndə heyətinin tərkibində Tehranın danışıqlar qrupunun yüksəkvəzifəli üzvləri yer alıb. ABŞ tərəfi Dohanın danışıqların bu kritik mərhələsində vasitəçi kimi mühüm rol oynadığını vurğulayıb.

Vaşinqtonun əsas tələbi İrandan hüquqi baxımdan möhkəm öhdəliklər əldə etməkdir. Ağ Ev İranın yüksək zənginləşdirilmiş uran ehtiyatlarını tamamilə məhv etməsini və nüvə silahı hazırlanmasından rəsmi şəkildə imtina etməsini tələb edir.

Amerikalı diplomatların sözlərinə görə, Tehran ötən bazar günü bu maddələrə prinsipial razılıq verib. Lakin daha sonra İran tərəfi nüvə proqramının detallı müzakirəsinin hazırkı razılaşma çərçivəsindən çıxarılaraq gələcək danışıqlara saxlanılmalı olduğunu bildirib.

Mənbələr qeyd ediblər ki, bu məsələ hazırkı dialoqun əsas maneələrindən biri olaraq qalır. Bununla yanaşı, İran xaricdəki aktivlərinin dərhal açılmasını və iqtisadi sanksiyaların aradan qaldırılması ilə bağlı təminatlar tələb edir.

Tehran hesab edir ki, bu addımlar durğunluq yaşayan milli iqtisadiyyata dəstək üçün vacibdir. ABŞ isə İran nüvə məsələsində real irəliləyiş nümayiş etdirməyincə heç bir maliyyə yardımının göstərilməyəcəyini bəyan edib.

Amerika diplomatik dairələrində “Toz yoxdursa, dollar da yoxdur” qeyri-rəsmi şüarı da formalaşıb. Bu ifadə Ağ Evin İranın təxminən 450 kiloqramlıq yüksək zənginləşdirilmiş uran ehtiyatı məhv edilmədən maliyyə vəsaitlərinin açılması ilə bağlı sənədləri imzalamayacağını göstərir.

Sevinc Əliyeva
Ordu.az