Ordu.az xəbər verir ki, müqavilə çərçivəsində torpedo komponentləri, ehtiyat hissələr, mühəndis dəstəyi, istehsal dəstəyi materialları və avadanlıqların təmiri ilə bağlı işlər görüləcək.
Məlumata görə, işlərin 80 faizi İndiana ştatındakı Bedford müəssisəsində, qalan hissəsi isə Rod-Aylenddəki “Middletown” müəssisəsində həyata keçiriləcək. Proqramın 2029-cu ilin aprelində tamamlanması planlaşdırılır.
MK 48 “Mod 7” ABŞ donanmasının əsas ağır sinfə məxsus torpedosu kimi önə çıxır. İlk dəfə 1970-ci illərdə xidmətə girən sistem bu gün həm sualtı qayıqlara, həm də suüstü hədəflərə qarşı istifadə olunan əsas silahlardan biri hesab olunur.
Təxminən 5,8 metr uzunluğa və 3 min 500 funt çəkiyə malik torpedo 650 funtluq yüksək partlayış qabiliyyətli döyüş başlığı daşıyır. Sistem 1200 futdan artıq dərinliklərdə fəaliyyət göstərə bilir, 55 knotdan yüksək sürətə çatır və aktiv-passiv sonar yönləndirmə kombinasiyası sayəsində yayınma manevri edən hədəfləri izləyə bilir.
MK 48-in “Mod 7” versiyası ABŞ və Avstraliya arasında birgə inkişaf proqramı çərçivəsində ortaya çıxıb və 2006-cı ildə ilkin əməliyyat qabiliyyətinə çatıb. Yeni versiyada təkmilləşdirilmiş yönləndirmə elektronikasının, daha qabaqcıl akustik hədəf nişanalmasının və xüsusilə sahil və dayaz sulu əməliyyatlara uyğunlaşdırılmış yeniliklərin yer aldığı bildirilir.
Müqavilənin təxminən 1 faizlik hissəsinin Xarici Hərbi Satışlar proqramı çərçivəsində Avstraliya Kral Donanması üçün ayrıldığı qeyd olunub. Virciniya ştatında yerləşən SAIC illərdir MK 48 istehsal zəncirində mühüm rol oynayır.
Şirkət 2021-ci ildə verilən 1,1 milyard dollarlıq müqavilə çərçivəsində torpedonun “Afterbody Tailcone” hissəsi və MK29 “Mod 0” döyüş başlığı yanacaq çənlərinin istehsalı, montajı, sınağı və təhvil işlərinə başlamışdı.
Torpedonun arxa hissəsini təşkil edən “Afterbody Tailcone” sistemi hərəkətvermə və naviqasiya komponentlərini özündə birləşdirir və hər bir vahiddə 500-dən çox detalın 26 əsas alt sistem altında inteqrasiyasını tələb edir.
ABŞ donanması son dövrlərdə torpedo ehtiyatlarının yetərsizliyinə diqqət çəkir. Təxminən 4,2 milyon dollarlıq vahid maya dəyərinə malik MK 48 “Mod 7” torpedolarının yüksək xərc səbəbindən genişmiqyaslı ehtiyat yaratmaq çətinləşir.
Bu səbəbdən ABŞ donanması daha aşağı xərcli yeni nəsil RAPTOR torpedo proqramı üzərində də işləyir. Lakin proqramın hələ də inkişaf mərhələsində olduğu bildirilir. Rəsmilər hazırkı əməliyyat ehtiyaclarının qarşılanması baxımından MK 48 “Mod 7”nin hələ də ABŞ sualtı donanmasının əsas silah sistemi olaraq qaldığını vurğulayır.
Sevinc Əliyeva
Ordu.az
