Ordu.az xəbər verir ki, bu barədə Türkiyə KİV-ləri məlumat yayıb.
ASELSAN-ın açıqlamasına görə, Türkiyə Silahlı Qüvvələrinin koordinasiyasında keçirilən və beynəlxalq miqyasda böyük maraq doğuran EFES-2026 təlimində müdafiə sənayesinin yerli və milli gücü bir daha nümayiş olunub.
İzmirin Səfərihisar rayonundakı Doğanbəy Atışlı Təlim Bölgəsində keçirilən təlimin Seçkin Müşahidəçi Gününü Prezident Ərdoğan da izləyib. ASELSAN baş direktoru Ahmet Akyol Prezidentə təlimdə istifadə olunan ASELSAN sistemləri barədə məlumat verib.
Təlimin son günündə fəaliyyətləri Milli Müdafiə naziri Yaşar Güler, Baş Qərargah rəisi ordu generalı Səlcuq Bayraktaroğlu, dost və müttəfiq ölkələrin müdafiə nazirləri, baş qərargah rəisləri və Türkiyə Silahlı Qüvvələrinin komanda heyəti də izləyib.
Təlimlə paralel keçirilən Müdafiə Sənayesi Sərgisinin ən böyük iştirakçıları arasında yer alan ASELSAN inkişaf etdirdiyi qabaqcıl texnologiyaları ilə həm qonaqların, həm də hərbi nümayəndə heyətlərinin diqqət mərkəzində olub.
Şirkət təlim meydanında yeni nəsil müdafiə sistemlərini sərgiləyərkən Türkiyə Silahlı Qüvvələri tərəfindən effektiv istifadə olunan məhsulları ilə də diqqət çəkib.
Real əməliyyat şəraitini əks etdirən ssenarilərdə fəaliyyət göstərən sistemlərin göstərdiyi uğur ASELSAN-ın əməliyyat etibarlılığını və sahədəki effektivliyini bir daha sübut edib.
ASELSAN-ın yüksək davamlılıq, sürətli reaksiyaya çeviklik və inteqrasiya olunmuş vəzifə performansı ilə önə çıxan sistemləri müasir döyüş mühitinin ehtiyaclarına cavab verən həllər arasında yer alıb.
Təlim boyu müxtəlif birliklərlə koordinasiyalı işləyən oyun dəyişdirici texnologiyaların performansı milli müdafiə sənayesinin çatdığı səviyyəni ortaya qoyub.
ASELSAN geniş məhsul çeşidi ilə, o cümlədən radioelektron mübarizə sistemlərindən rabitə sistemlərinə, elektro-optik sistemlərdən komanda-idarəetmə avadanlıqlarına qədər onlarla milli sistemlə sərgidə yer alıb.
Təlimdə ASELSAN-ın hazırladığı KOCATEPE Döyüş Sahəsi İdarəetmə Sistemi ilk dəfə istifadə olunub. KOCATEPE komandanlar və komanda məntəqəsi heyəti üçün döyüş zonasının bütün səviyyələr üzrə ümumi mənzərəsini təqdim edib.
Stenddə KORKUT 25 hava hücumundan müdafiə sistemi, KILIÇ OSA, TUFAN kamikadze insansız dəniz platforması, elektro-optik sistemlər və “Polad Günbəz” elementləri də daxil olmaqla bir çox sistem nümayiş etdirilib.
Türkiyənin çoxtəbəqəli hava hücumundan müdafiə memarlığı olan “Polad Günbəz”in əsas elementləri təlim çərçivəsində ilk dəfə eyni ssenari daxilində birlikdə fəaliyyət göstərib.
“Polad Günbəz” müxtəlif hündürlük və məsafələrdə çalışan sensorları, komanda-idarəetmə sistemlərini və önləyici elementləri tək bir şəbəkə əsaslı quruluşda birləşdirməyi hədəfləyir.
EFES-2026-da bu arxitekturanın mühüm elementləri eyni vaxtda fəaliyyət göstərərək Türkiyənin inteqrasiya olunmuş hava və raketdən müdafiə qabiliyyətinin sahədə necə işlədiyini nümayiş etdirib.
Bu çərçivədə ASELSAN-ın hazırladığı SİPER, HİSAR-A, HİSAR-O, KORKUT və İHTAR təlimin diqqətçəkən sistemləri kimi istifadə olunub.
ASELSAN tərəfindən hazırlanan KORKUT 35 alçaq hündürlükdə hava hücumundan müdafiə sistemi təlimin ən diqqətçəkən yerli elementlərindən biri kimi önə çıxıb.
KORKUT qəlpəli sursat atma qabiliyyəti ilə pilotsuz uçuş aparatları və raketlər də daxil olmaqla müasir hava təhdidlərinə qarşı gecə-gündüz effektiv müdafiə təmin edib.
Türkiyə Silahlı Qüvvələrinin inventarına daxil edilən yeni nəsil əsas döyüş tankı ALTAY da EFES-də nümayiş etdirilib. ALTAY ASELSAN-ın kritik texnologiyaları ilə təchiz olunub və bu sistemlər tankın effektivliyini, yaşama qabiliyyətini və situativ şüurluluğunu ən yüksək səviyyəyə çatdırıb.
Təlimdə ASELSAN-ın radioelektron mübarizə şəraitinə davamlı, yüksək təhlükəsizliyə malik mesajlaşma, fayl ötürmə və canlı görüntülü danışıq proqramı olan ARTSoft MAESTRO da istifadə olunub.
ASELSAN-ın təlimdə ACAR pilotsuz uçuş aparatı aşkarlama radarı, quru əsaslı radioelektron dəstək sistemi MİLKED, modernizasiya olunmuş yedəkdə daşınan top, KALKAN hava hücumundan müdafiə sistemi, SERHAT minaatan aşkarlama radarı və ASELPOD elektro-optik hədəfləmə podu da daxil olmaqla otuzdan çox sistemi fəaliyyət göstərib.
ASELSAN-ın sahədə tətbiq olunan həlləri bir çox xarici hərbi heyət və sənaye nümayəndələri tərəfindən yaxından izlənilib. Şirkətin sınaqdan çıxmış texnologiyaları Türkiyə müdafiə sənayesinin qlobal rəqabətdə yüksəlişinin konkret nümunələrindən biri kimi diqqət çəkib.
Sevinc Əliyeva
Ordu.az
