Ordu.az xəbər verir ki, şirkət sərgi müddətində aldığı rəylər əsasında yerli və milli yüksək texnologiya həllərini inkişaf etdirməyə davam edir.

Sərgi meydanında “Defensehere”yə danışan Seyfəddin Cevdət Uludoğan bildirib ki, SAHA EXPO 2026 gözləntilərin üzərində keçib.

Uludoğan əvvəlki sifarişlərin say baxımından ciddi şəkildə artdığını deyib və bunun həm istehsal həcminə, həm də Türkiyə müdafiə sənayesinin ixrac göstəricilərinə müsbət təsir göstərdiyini vurğulayıb.

Türkiyə müdafiə sənayesinin bir parçası olmaqdan qürur duyduqlarını bildirən Uludoğan şirkətin dünyada çox dar bir sahədə məhsul hazırladığına diqqət çəkib.

O, sərgi boyunca dünyanın müxtəlif bölgələrindən gələn xarici hərbi nümayəndə heyətləri ilə görüşlər keçirdiklərini, bu təmasların mühüm əməkdaşlıqlara çevrildiyini söyləyib.

Şirkətin 2026 və 2027 hədəflərindən danışan Uludoğan əsas prioritetlərinin satışdan çox istehsal gücünü və ümumi satış həcmini artırmaq olduğunu qeyd edib. O bildirib ki, əvvəl yüzlərlə ifadə edilən istehsal imkanları artıq minlərlə ölçülür və bu, sektorda artan ehtiyacın göstəricisidir.

Axtarış-xilasetmə, təbii fəlakətlərin idarə olunması və müdafiə əməliyyatları üçün yenilikçi sistemlər hazırlayan “Uludoğan Savunma” xüsusilə çətin coğrafi və əməliyyat şəraitində işləyə bilən nano sinfinə məxsus insansız helikopter texnologiyalarına fokuslanır.

Şirkətin hazırladığı sistemlər dərin vadilərdə, sıx meşəlik ərazilərdə və GPS siqnalının olmadığı qapalı və ya məhdud mühitlərdə avtonom tapşırıq icra edə bilir.

Bu da əlçatması çətin bölgələrdə səmərəli kəşfiyyat, müşahidə və vəziyyətin qiymətləndirilməsini təmin edir. “Uludoğan Savunma”nın önə çıxan həlləri arasında nano sinfinə məxsus insansız helikopter platforması və süni zəka dəstəkli uçuş idarəetmə kartı yer alır.

Şirkət bu sistemlərlə yüksək manevr qabiliyyəti, aşağı xərc və əməliyyat çevikliyi təqdim etməyi hədəfləyir.


Sevinc Əliyeva
Ordu.az