Ordu.az xəbər verir ki, bu barədə Rusiya KİV-ləri məlumat yayıb.
Rusiya Müdafiə Nazirliyinin məlumatına görə, 19-21 may tarixləri arasında nüvə qüvvələrinin hazırlanması və istifadəsinə yönəlmiş komanda-idarəetmə təlimləri icra olunur.
Təlimə Strateji Raket Qoşunları, Şimal və Sakit okean donanmaları, Uzaqmənzilli Aviasiya Komandanlığı ilə birlikdə Leninqrad və Mərkəzi Hərbi Dairələrinə bağlı birliklər qatılır.
Moskva rəhbərliyi bildirib ki, təlimlərin məqsədi “hücum təhlükəsi” vəziyyətində tətbiq ediləcək əməliyyat prosedurlarını yoxlamaq və strateji çəkindirmə mexanizmlərinin hazırlıq səviyyəsini qiymətləndirməkdir.
Nüvə triadasına xüsusi vurğu
Rusiya Müdafiə Nazirliyi təlim çərçivəsində xüsusilə nüvə triadasının müxtəlif ünsürləri arasındakı koordinasiyanın inkişaf etdirilməsinə, komanda-idarəetmə proseslərinin gücləndirilməsinə və genişmiqyaslı logistik dəstək imkanlarının sınaqdan keçirilməsinə diqqət yetirildiyini bildirib.
Təlimin tətbiqi mərhələsində isə bəzi nüvə qüvvələri birləşmələrinin döyüş hazırlığı səviyyəsinə gətirilməsi və Rusiya daxilindəki sınaq poliqonlarında ballistik və qanadlı raket atışlarının həyata keçirilməsi planlaşdırılır.
Açıqlanan rəqəmlərə görə, təlimə 64 mindən çox hərbçi ilə təxminən 7 min 800 hərbi texnika və sistem qatılır.
Bunlar arasında 200-dən çox raket buraxılış qurğusu, 140-dan artıq hava platforması, 73 suüstü döyüş gəmisi və 13 sualtı qayıq var.
Təlimə qatılan sualtı qayıqlardan 8-nin strateji raket sualtı qayığı olduğu və onların Rusiyanın dənizdə yerləşən nüvə çəkindirmə qabiliyyətinin əsas ünsürlərini təşkil etdiyi bildirilir.
Belarus detalları diqqət çəkdi
Təlim çərçivəsində Belarus ərazisində yerləşdirilmiş taktiki nüvə silahlarının mümkün istifadəsinə yönəlmiş birgə məşqlərin də həyata keçiriləcəyi açıqlanıb.
Rusiya son illərdə xüsusilə Ukrayna müharibəsi və Qərblə artan gərginlik fonunda oxşar nüvə təlimlərindən strateji təzyiq və güc nümayişi vasitəsi kimi istifadə edir.
Sözügedən təlim açıqlaması da Rusiya-Ukrayna müharibəsinin davam etdiyi və Moskva ilə Qərb ölkələri arasında gərginliyin sürdüyü bir dövrdə verilib.
Daha əvvəl Belarusda da nüvə silahının istifadəsinə yönəlmiş birlik təlimlərinin başladığı bildirilmişdi.
Sevinc Əliyeva
Ordu.az
