Ordu.az xəbər verir ki, qərar proqramın “Milestone C” təsdiqini almasından sonra açıqlanıb.
Bununla da MQ-25A inkişaf mərhələsindən istehsal mərhələsinə keçən mühüm bir həddi aşmış olub. İlk istehsal müqaviləsi bu yay imzalanacaq.
ABŞ Hərbi Dəniz Qüvvələri bu yay üç ədəd MQ-25A-nı əhatə edən “LRIP Lot 1” müqaviləsini “Boeing”ə verməyi planlaşdırır.
Proqram çərçivəsində həmçinin:
“Lot 2” üçün 3 ədəd,
“Lot 3” üçün 5 ədəd təyyarəlik seçim hüquqlarının müqavilədə yer alması nəzərdə tutulur.
ABŞ Hərbi Dəniz Naziri vəzifəsini icra edən Hunq Cao MQ-25A-nın aviadaşıyıcı qruplarının əməliyyat məsafəsini ciddi şəkildə genişləndirəcəyini vurğulayaraq belə deyib: “İnsansız yanacaq doldurma qabiliyyəti hər hansı rəqibə qarşı əməliyyat çıxışımızı artırır. MQ-25A-nın istehsal mərhələsinə keçməsi aviadaşıyıcı qruplarımıza öldürücülüyü artıracaq kritik bir qabiliyyəti döyüşçülərimizə qazandırır”.
MQ-25A “Stingray” ABŞ Hərbi Dəniz Qüvvələri tərəfindən tam inteqrasiya edilmiş dünyanın ilk gəmi əsaslı pilotsuz yanacaq doldurma təyyarəsi kimi təsvir olunur.
Platformanın əsas vəzifəsi aviadaşıyıcılardakı hava qanadına havada yanacaq doldurma dəstəyi verməkdir. Bununla da F/A-18E/F “Super Hornet” döyüş təyyarələrinin tanker tapşırıqlarından azad edilərək zərbə tapşırıqlarına daha çox fokuslanması hədəflənir.
MQ-25A-nın xidmətə daxil olması ilə aviadaşıyıcı əsaslı hava elementlərinin məsafəsinin ciddi şəkildə artacağı gözlənilir.
Eyni zamanda:
“Super Hornet” parkının aşınmasının azaldılması,
aviadaşıyıcı hava qanadının tapşırıq tutumunun artırılması,
insanlı və insansız platformaların inteqrasiyasının sürətləndirilməsi hədəflənir.
ABŞ Hərbi Dəniz Qüvvələrinin Aviasiya Portfeli Təchizat Meneceri vitse-admiral Con E. Doerti IV “Milestone C” təsdiqinin bu proqram üçün mühüm dönüm nöqtəsi olduğunu deyib.
“MQ-25A davamlı havada yanacaq doldurma qabiliyyəti verərək hava qanadının tutumunu artıracaq və aviadaşıyıcı qruplarımızın ölümcül, çevik və tapşırığa hazır qalmasını təmin edəcək”, - deyə Doerti bildirib.
Sevinc Əliyeva
Ordu.az
