Ordu.az xəbər verir ki, bu barədə xarici KİV-lər məlumat yayıb.
Şirkətin yaydığı məlumata görə, GE426 performans, xərc baxımından effektivlik və seriyalı istehsal imkanlarına cavab verəcək şəkildə xüsusi olaraq pilotsuz və avtonom döyüş platformaları üçün hazırlanır.
GE426 mühərriki ABŞ Hərbi Hava Qüvvələri Araşdırma Laboratoriyasının həyata keçirdiyi “Autonomous Collaborative Platforms” proqramı çərçivəsində hazırlanır. Bu təşəbbüs pilotlu döyüş təyyarələri ilə koordinasiyalı fəaliyyət göstərə biləcək avtonom hava platformaları üçün texnologiyaların inkişaf etdirilməsini nəzərdə tutur.
Proqram ABŞ-nin “Collaborative Combat Aircraft” konsepsiyası üçün kritik əhəmiyyət daşıyan alt sistemlərdən biri hesab olunur. Yeni müqavilə çərçivəsində “GE Aerospace” mühərrikin “Preliminary Design Review” mərhələsini tamamlayacaq. Bu mərhələdə mühərrikin texniki arxitekturası, istehsal imkanları, xərc strukturu və performans parametrləri ətraflı şəkildə qiymətləndiriləcək.
“GE Aerospace” GE426 konsepsiya dizayn baxışını 2025-ci ilin avqustunda tamamlamışdı.
“GE Aerospace Edison Works” şirkətinin vitse-prezidenti və baş direktoru Stiv Rassel müqavilə ilə bağlı bunları deyib: “GEK800 proqramı ilə konsepsiyadan mühərrik demonstratoruna sürətlə keçə biləcəyimizi sübut etdik. İndi eyni yanaşmanı GE426ya tətbiq edərək döyüşçünün ehtiyac duyduğu performans, xərc effektivliyi və hazırlıq səviyyəsini təmin etməyə fokuslanırıq”.
“GE Aerospace” son illərdə kiçik və münasib xərcli mühərriklərin seriyalı istehsalına yönəlmiş investisiyalarını artırır.
Şirkət daha əvvəl “Kratos Defense & Security Solutions” ilə əməkdaşlıq çərçivəsində GEK800 və GEK1500 mühərriklərini inkişaf etdirib.
GE426-nın da oxşar şəkildə genişləndirilə bilən istehsal arxitekturası ilə avtonom döyüş təyyarələri və digər qabaqcıl hava platformalarını gücləndirməsi nəzərdə tutulur.
ABŞ Hərbi Hava Qüvvələrinin CCA konsepsiyası pilotlu döyüş təyyarələri ilə yanaşı fəaliyyət göstərəcək daha aşağı xərcli və çoxsaylı pilotsuz döyüş təyyarələrinin hazırlanmasını nəzərdə tutur. GE426 mühərriki bu platformaların ehtiyac duyduğu performans və xərc balansını təmin edəcək əsas komponentlərdən biri kimi qiymətləndirilir.
Yeni müqavilə “GE Aerospace” şirkətinin gələcəyin pilotsuz döyüş təyyarələri üçün hazırlanmış mühərrik texnologiyalarındakı rolunu gücləndirərkən, ABŞ Hərbi Hava Qüvvələrinin avtonom hava gücü konsepsiyası istiqamətindəki fəaliyyətində də mühüm mərhələyə işarə edir.
Sevinc Əliyeva
Ordu.az
