Ordu.az xəbər verir ki, bunu Ermənistanın birinci ombudsmanı Larisa Alaverdyan bildirib.
Alaverdyan qeyd edib ki, hakimiyyət daxilində ritorika dəyişib və sanki hamı bir-biri ilə daha kobud danışmaq yarışına girib.
“Onlar birbaşa hücuma keçiblər və bu hücum açıq şəkildə görünür. Təəssüf doğuran məqam odur ki, insan hüquqları müdafiəçisi buna reaksiya vermir. Kristine Qriqoryandan başlayaraq biz bu vəziyyətlə üzləşmişik. İnsanlar soruşurlar ki, hazırkı ombudsman hansı insan hüquqlarını müdafiə edir? O, bir nəfərin müdafiəçisinə çevrilib”, - deyə o bildirib.
Keçmiş erməni ombudsman vurğulayıb ki, savadlı təbəqə bu kobud metodlara utancverici şəkildə boyun əyir.
“Bu komanda iki məqsədlə hakimiyyətə gəlib: Qarabağı Azərbaycana vermək və Ermənistanı Türkiyənin əlavəsinə çevirmək. Amma təəccüblü olan baş verənlər deyil, akademik ictimaiyyətin susqunluğudur. Onlar mənəvi baxımdan dürüst olmağa borcludurlar. Söhbət bir tikə çörək üçün işləməkdən getmir. Təhsilli və savadlı təbəqə xalqa xəyanət edir. Amma bu komanda xain deyil, onlar məhz bu ideologiya ilə hakimiyyətə gəliblər”, - deyə Alaverdyan bildirib.
O, Nikol Paşinyanın Qarabağla bağlı bəyanatlarını da sərt tənqid edib.
“Nikolun qanla dolu suallarından sonra onun arxasınca necə getmək olar? İndi artıq heç kim aldadıla bilməz. Amma vəziyyət elədir ki, Nikol Paşinyan komandasının hakimiyyətdə qalıb-qalmaması xalqın rəyindən yox, xarici idarəetmədən, ən qaranlıq qlobalist mərkəzlərdən asılıdır və biz onların simalarını İrəvanda gördük. Bu komandanı seçənlər səsverməyə gedənlər deyil, getməyənlərdir”, - deyə keçmiş erməni ombudsman qeyd edib.
Alaverdyan hesab edir ki, seçkilərə getməyən və “biz siyasətlə məşğul olmuruq” deyən insanlar əslində hakimiyyətin tərəfdarlarıdır.
“Sükut yalnız razılıq əlamətidir, başqa variant yoxdur. Səsverməyə getməyənlər bu hakimiyyəti seçmiş olurlar. İnsan hüquqları ləyaqət üzərində qurulmalıdır. Amma bu hakimiyyət insanları sıfır yerinə qoyub, heç nədən çəkinmir və burada mənəvi tərəfdən və ya hüquqdan danışmaq artıq mənasızdır”, - deyə o bildirib.
Keçmiş erməni ombudsman əlavə edib ki, əgər hakimiyyət məğlub olduğunu aydın şəkildə görsə, seçkiləri ləğv edib hakimiyyətdə qalmağa çalışa bilər.
“Bu, ən real ssenaridir. Məgər biz indi müharibədə deyilik? Rusiyadan danışaraq “hibrid müdaxilə” ifadəsini işlədirlər. Bu hakimiyyət “bizi seçməsəniz, müharibə olacaq” deyirsə, bu, artıq müharibədir”, - deyə Alaverdyan bildirib.
Alpər Mövludoğlu
Ordu.az
