Ordu.az xəbər verir ki, fotolarda briqadanın hava hücumundan müdafiə batalyonuna bağlı şəxsi heyətin FN-16 sistemləri ilə xidmət apardığı görünür.

Briqadanın mətbuat xidməti tərəfindən yayılan açıqlamada hava hücumundan müdafiə bölmələrinin gecə-gündüz fəaliyyət göstərdiyi bildirilib.

“A zenit-raket batalyonunun şəxsi heyəti göy üzünü gecə-gündüz diqqətlə izləyir. Düşmən hədəflərini aşkar edir, izləyir və hücum həyata keçirmədən öncə məhv edir”, - deyə açıqlamada qeyd olunub.

Açıqlamada istifadə olunan sistemin adı göstərilməsə də, yayımlanan görüntülərdə FN-16 buraxıcı qurğuları açıq şəkildə seçilir.

FN-16 Çinin QW-2 (Vanguard-2) daşına bilən hava hücumundan müdafiə sisteminin ixrac versiyası kimi tanınır.

İnfraqırmızı axtarış başlığına malik sistem aşağı hündürlükdə uçan helikopterlərə, döyüş təyyarələrinə, qanadlı raketlərə və pilotsuz uçuş aparatlarına qarşı istifadə edilə bilir.

Nəqliyyat vasitəsi üzərində radar və ya atış idarəetmə sisteminə ehtiyac olmadan fəaliyyət göstərə bilən FN-16 piyada birliklərinə daşına bilən hava hücumundan müdafiə imkanı qazandırır.

FN-16 sistemlərinin Ukraynaya hansı yolla çatdırıldığı ilə bağlı rəsmi açıqlama yoxdur.

Bəzi mənbələr bu sistemlərin İran vasitəsilə Yəmənə göndərilmək üzrə olarkən ələ keçirilən sursat tədarüklərindən Ukraynaya ötürülmüş ola biləcəyini iddia edir.

Lakin bu iddia təsdiqlənməyib və müxtəlif tədarük yolları da ehtimal edilir.

Ukraynadakı müharibədə FN seriyalı raketlərin Rusiyaya məxsus “Kalibr” qanadlı raketlərini vurmaq üçün istifadə edildiyinə dair daha əvvəl müxtəlif hesabatlar yayılmışdı.

Bu cür vurma sistemin yalnız helikopter və təyyarələrə qarşı deyil, uyğun şəraitdə qanadlı raketlərə qarşı da effektiv ola biləcəyini göstərir.

Sevinc Əliyeva
Ordu.az