“KoçSavunma” SAHA 2026-da strateji müqavilələr imzalayıb - VİDEO
Oxunub: 518
14:26
13 May 2026
“Koç Bilgi ve Savunma Teknolojileri AŞ” (KoçSavunma) 1700-dən çox şirkətin və 120-yə yaxın ölkədən 200 mindən artıq ziyarətçinin iştirak etdiyi SAHA 2026 Beynəlxalq Müdafiə, Aviasiya və Kosmik Sənaye Sərgisində əməkdaşlıqlarını genişləndirib, həllərini və imkanlarını təqdim edib, strateji əməkdaşlıq müqavilələri imzalayıb.
Ordu.az xəbər verir ki, sualtı akustika və dəniz platformalarına yönəlmiş elektron sistemlər sahəsində ixtisaslaşan, elmi-tədqiqat və təcrübi-konstruktor işləri əsasında yerli və milli həllər hazırlayan şirkət Türkiyə müdafiə sənayesinin dənizlərdəki gücünü artırmaq üçün hazırladığı yüksək texnologiyalı sistemləri ziyarətçilərə təqdim edib.
“KoçSavunma”nın tədbir çərçivəsində imzaladığı strateji müqavilələrdən biri Portuqaliyada yerləşən “Timestamp” texnologiya şirkəti ilə bağlanan əməkdaşlıq müqaviləsi olub.
Şirkətin bu müqavilə ilə bağlı açıqlamasında qeyd edilib: “SAHA 2026 çərçivəsində Portuqaliyada yerləşən “Timestamp” texnologiya şirkəti ilə strateji əməkdaşlıq müqaviləsi imzaladıq. Bu əməkdaşlıq çərçivəsində süni zəka dəstəkli müdafiə texnologiyaları, sualtı akustikası və çox təbəqəli məlumat birləşməsi sahələrində yeni nəsil həllər hazırlamağı hədəfləyirik.
Fərqli kəşfiyyat mənbələrini real vaxt rejimində analiz imkanları ilə bir araya gətirən texnologiyalar üzərində işləyərək əməliyyat məlumatlılığını gücləndirən, qərar qəbuletmə proseslərini sürətləndirən və gələcəyin təhlükəsizlik ehtiyaclarına cavab verən sistemlər hazırlayırıq. Müdafiə texnologiyalarında mühəndislik gücümüzü beynəlxalq əməkdaşlıqlarla daha da irəli aparmağa davam edirik”.
Şirkət bu fəaliyyətlərlə yanaşı həm bu günün, həm də gələcəyin dəniz əməliyyatlarına istiqamət vermək məqsədilə yerli və beynəlxalq ziyarətçilərlə görüşlər keçirib.
