Ordu.az xəbər verir ki, bu barədə Ermənistanın “168.am” nəşri “Sübutetmə və prosessual hərəkətlər hələ də həyata keçirilir: İstintaq Komitəsi Şuşa və məşhur əks-zərbə əməliyyatı ilə bağlı prosesləri gizli saxlayır” başlıqlı məqaləsində yazıb.
Nəşrə görə, Ermənistan parlamentinin müdafiə və təhlükəsizlik məsələləri üzrə daimi komissiyasının sədri Andranik Köçəryan müxtəlif hallarda bəyan edib ki, 44 günlük müharibə ilə bağlı hesabatda silahlanma ilə bağlı sualların cavabları yer alacaq və bu, mahiyyət etibarilə baş verib.
“168.am” ilə söhbətində Ermənistan parlamentinin “Hayastan” fraksiyasının deputatı Geğam Manukyan bildirib ki, 44 günlük müharibə ilə bağlı hesabatda silahların alınmasına və satınalma planlarının dəyişdirilməsinə toxunulub, bunun ardınca nəticələrin qiymətləndirilməsi gəlir.
“Biz bu mövzuya hələ ötən ilin sentyabrında “İstintaq komissiyasının hesabatının subyektiv tərəfi: Faktların izi ilə” başlıqlı məqaləmizdə də toxunmuşduq.
Üstəlik, bildirmişdik ki, hesabata Andranik Köçəryanın “Su-30”larla bağlı bir neçə səhifəlik məktub-təhlili də əlavə edilib. O, həmin məktubu Paşinyana təqdim etmişdi və bu barədə Paşinyanın istintaq komissiyasında dindirilməsi zamanı da xatırladılmışdı.
Lakin Andranik Köçəryan bir dəfə də bəyan etmişdi ki, silahların yanlış satınalmaları olub və İstintaq Komissiyasının topladığı nəhəng məlumat paketini Ermənistanın baş prokuroruna göndərib. Söhbət xüsusilə “Osa-AK” zenit-raket komplekslərindən gedirdi”, - deyə nəşr yazıb.
Müəllif qeyd edib ki, Ermənistan Baş Prokurorluğu “168.am”a cinayət icraatının olduğunu bildirmiş, lakin başqa təfərrüat açıqlamamışdı.
“Bu yaxınlarda isə Andranik Köçəryan qeyd etmişdi ki, hesabatdan çıxış edərək müvafiq orqanların görməli olduğu işlər var və buna hələ çatacaqlar.
Buna uyğun olaraq sorğumuz vasitəsilə əvvəlcə Ermənistan İstintaq Komitəsindən aydınlaşdırmağa çalışdıq: 44 günlük müharibə ilə bağlı hesabatı alıblarmı, hesabat və ya İstintaq Komissiyasının təqdim etdiyi materiallar əsasında, o cümlədən silahların yararlı-yararsız olması ilə bağlı cinayət icraatları başlanıbmı?
Aprelin 27-də bizə göndərdiyi cavab məktubunda Ermənistan İstintaq Komitəsi məlumat verib ki, 2020-ci ilin 44 günlük hərbi əməliyyatları ilə bağlı hesabat və ya istintaq komissiyasının rəyini almayıb.
Ermənistan İstintaq Komitəsinin sədri Artur Poğosyana yazılı formada aşağıdakı sualları da göndərmişik:
2020-ci il oktyabrın 7-də ordunun məşhur əks-zərbə əməliyyatı epizodu üzrə hazırda cinayət işi varmı, yoxsa “müdafiə ordusu”nun (ləğv edilmiş qanunsuz “hərbi birləşmə”-red.) keçmiş komandanı Cəlal Harutyunyan barəsində bəraətverici əsasla cinayət təqibinin dayandırılmasından sonra bu müharibə epizodu artıq araşdırma predmeti deyil və ya olmayıb? Bu hərbi əməliyyat və ya epizodla bağlı Nikol Paşinyan, Milli Təhlükəsizlik Xidmətinin keçmiş direktoru və İstintaq Komitəsinin keçmiş sədri Argişti Kyaramyan, “Qarabağ təhlükəsizlik şurası”nın (ləğv edilmiş qondarma qurum-red.) keçmiş katibi Samvel Babayan, Baş Qərargahın keçmiş rəisi Onik Qasparyan və həmin əməliyyatın müzakirəsində iştirak edən digər şəxslər nə vaxtsa ifadə veriblərmi?
2020-ci il noyabrın 7-dən sonra Şuşanın “geri alınması” (yenidən işğal cəhdi-red.) üzrə əməliyyatlar olub, bu hal araşdırma predmetinə çevrilibmi və hansı iş çərçivəsində?
“Ermənistan İstintaq Komitəsinin Baş Hərbi İstintaq İdarəsində 2020-ci ilin 44 günlük hərbi əməliyyatlarının halları ilə bağlı başlanmış cinayət icraatları üzrə geniş sübutetmə və digər prosessual hərəkətlər həyata keçirilib və həyata keçirilməkdə davam edir, o cümlədən çoxsaylı şahidlər dindirilib, müvafiq ekspertizalar təyin edilib və onların rəyləri alınıb, nəticədə bir sıra cinayət icraatları ittiham aktı ilə məhkəməyə göndərilib”, - deyə İstintaq Komitəsi suallarımıza cavab olaraq qeyd edib və əlavə edib ki, Ermənistan Cinayət Prosessual Məcəlləsinin 186-cı maddəsinin 2-ci hissəsinin və “İnformasiya azadlığı haqqında” Ermənistan qanununun 8-ci maddəsinin 1-ci hissəsinin 3-cü bəndinin müddəaları əsas götürülərək digər suallarla bağlı məlumat təqdim etmək mümkün deyil, çünki onlar açıqlanması mümkün olmayan ilkin istintaq məlumatlarını ehtiva edir”, - deyə müəllif yazıb.
Bu kontekstdə nəşr əlavə edib ki, 2025-ci ildə həmin İstintaq Komitəsi nəşrə bildirmişdi: “2020-ci il oktyabrın 7-də həyata keçirilmiş ordu əks-zərbəsi faktı üzrə başlanmış cinayət icraatı üzrə ibtidai istintaq davam edir”.
“2020-ci il noyabrın 7-dən sonra Şuşa istiqamətində baş vermiş əməliyyatlara gəlincə, 2024-cü ildə İstintaq Komitəsi bununla bağlı suala cavab verərək qeyd etmişdi:
“44 günlük müharibə zamanı genişlənmiş hərbi əməliyyatların bütün istiqamətləri, o cümlədən 2020-ci il noyabrın 7-dən sonra Şuşa istiqamətində baş vermiş hadisələr hakimiyyətin fəaliyyətsizliyi, xidmətə səhlənkar münasibət göstərilməsi, hərbi xidmətin ayrı-ayrı vəzifələrinin icrasından imtina edilməsi, hərbi xidmətin aparılması qaydasına qarşı yönəlmiş ehtimal edilən digər cinayətlərin törədilməsi faktları ilə bağlı Ermənistan İstintaq Komitəsinin Baş Hərbi İstintaq İdarəsinin xüsusilə mühüm işlərin istintaqı idarəsində həyata keçirilən cinayət icraatları çərçivəsində araşdırma predmetinə çevrilib”.
Eyni zamanda Ermənistan İstintaq Komitəsi bildirmişdi ki, o vaxt Ermənistan İstintaq Komitəsinin sədri olan Argişti Kyaramyan “2020-ci ilin 44 günlük müharibəsi zamanı elan edilmiş hərbi vəziyyət şəraitində hərbi qaydaya qarşı yönəlmiş, həmçinin hərbi əməliyyatlarla bağlı digər cinayətlərə dair cinayət icraatları çərçivəsində dindirilməyib”, - deyə “168.am” bildirib.
Müəllif yazıb ki, öz növbəsində Nikol Paşinyan bir dəfə jurnalistlərlə görüşdə 44 günlük müharibə kontekstində dindirildiyini bəyan edib.
“Qeyd edək ki, hazırkı mərhələdə 44 günlük müharibə ilə bağlı Paşinyanın dindirilməsinin bir halı məlumdur. Hələ 3 il əvvəl mətbuatda yayılan məlumatlara görə, o, 44 günlük müharibə zamanı Ermənistanın bir qrup yüksəkvəzifəli şəxsi tərəfindən vəzifə səlahiyyətlərindən sui-istifadə edilməsi ehtimal olunan cinayət faktı üzrə başlanmış cinayət icraatı çərçivəsində şahid qismində dindirilmişdi.
Əlavə edək ki, Paşinyanın dindirilməsi tələbini o vaxt hökumət və Baş Prokurorluq binalarının qarşısında etiraz aksiyaları keçirən həlak olanların yaxınları irəli sürmüşdülər.
İstintaq Komitəsinin məxfiliyindən Paşinyanın dindirildiyi və ya dindirilə biləcəyi başqa cinayət icraatlarının olması nəticəsini çıxarmaq lazımdırmı, bunu zaman göstərəcək.
Məsələn, maraqlıdır: Paşinyan məşhur əks-zərbə əməliyyatında hansı statusla iştirak edib və onu təsdiqləyib, yaxud Şuşanın əks-hücumla “geri alınması” əmrini hansı statusla verib, baş nazir kimi, yoxsa ali baş komandan kimi?”, - deyə məqalədə qeyd edilib.
Alpər Mövludoğlu
Ordu.az
