Ordu.az xəbər verir ki, ümumi həcmi təxminən 1,5 trilyon dollar olan büdcə təklifində F-47 proqramı üçün təxminən 5 milyard dollar tələb olunarkən, F/A-XX proqramına cəmi 140 milyon dollar ayrılıb.
F-47 proqramına güclü maliyyələşdirmə
Büdcə sənədlərinə görə, F-47 proqramına ayrılan vəsaitin hamısı əsas büdcə maddələri hesabına qarşılanacaq. Administrasiya bu proqramın hava üstünlüyünü təmin etmək və qlobal çəkindirməni artırmaq hədəfləri baxımından prioritet olduğunu vurğulayıb.
Sənədlərdə qeyd edilib: “Administrasiya F-47 altıncı nəsil döyüş təyyarəsi proqramını sürətlə irəli apararaq ABŞ-nin hava məkanında üstünlüyünü təmin etməyi, çəkindirməni artırmağı və qlobal miqyasda güc proyeksiyası yaratmağı hədəfləyir”.
Bundan əlavə, 2027-ci il büdcə planlamasına görə F-47-nin ilk uçuşunun 2028-ci ildə həyata keçirilməsi hədəflənir.
F/A-XX proqramına məhdud büdcə
Hərbi Dəniz Qüvvələrinin yeni nəsil döyüş təyyarəsi proqramı olan F/A-XX üçün ayrılan 140 milyon dolların 72 milyon dollarlıq hissəsinin əlavə büdcə tənzimlənməsi çərçivəsində təmin olunması nəzərdə tutulur.
Bu vəziyyətin Pentaqon, Ağ Ev və Konqres arasında proqramın prioriteti ilə bağlı müzakirələri yenidən gündəmə gətirə biləcəyi qeyd olunur.
Konqres 2026-cı ildə dəstəyi artırmışdı
2026-cı ildə ABŞ Konqresi F/A-XX proqramına ayrılan büdcəni əhəmiyyətli dərəcədə artırmışdı. Proqram üçün ilkin olaraq nəzərdə tutulan 74 milyon dollarlıq vəsait 897 milyon dollara qaldırılmış, əlavə büdcə maddələri ilə birlikdə ümumi dəstək təxminən 1,7 milyard dollara çatmışdı.
Konqres üzvləri proqramın tədarük strategiyası və xərcləmə planları ilə bağlı daha çox təfərrüat tələb edərkən, əvvəlki illərdə ayrılmış vəsaitlərin istifadəsindəki gecikmələrlə bağlı izahat istəmişdilər.
F-47 proqramı əvvəlki büdcədə də öndə idi
F-47 proqramı 2026-cı il büdcəsində də yüksək prioritetli layihələr sırasında yer almışdı. Həmin il üçün 2,5 milyard dollarlıq əsas büdcə və 900 milyon dollarlıq əlavə vəsait ayrılaraq ümumi maliyyələşdirmə 3,5 milyard dollara çatmışdı.
F-35 tədarükü davam edir
2027-ci il büdcə təklifində həmçinin F-35 “Lightning II” döyüş təyyarələrinin tədarükü də yer alıb. Buna görə ümumilikdə 85 ədəd F-35 alınması planlaşdırılır.
Bu təyyarələrin 38-i Hərbi Hava Qüvvələri, 37-si Hərbi Dəniz Qüvvələri və 10-u Dəniz Piyadaları üçün nəzərdə tutulur. Təyyarələrin 32 ədədinin əsas büdcədən, 53 ədədinin isə əlavə büdcə maddələrindən maliyyələşdirilməsi planlaşdırılır.
Sevinc Əliyeva
Ordu.az
