Ordu.az xəbər verir ki, bu məlumat ABŞ kəşfiyyat hesabatlarına əsaslanan “The New York Times” xəbərində yer alıb.

Hesabatlara görə, Tehran intensiv bombardmana baxmayaraq ballistik raket ehtiyatlarının və mobil buraxılış qurğularının mühüm hissəsini qoruyub saxlaya bilib.

Pentaqon beş həftəlik əməliyyat müddətində 11 min hədəfin vurulduğunu bildirsə də, ABŞ kəşfiyyat qurumları İranın raket imkanlarının qısa müddətdə tam zərərsizləşdirildiyi barədə qiymətləndirmələrə şübhə ilə yanaşır.

Saxta hədəflərin geniş istifadəsi və texnikanın dərin mağaralarda gizlədilməsi hərbi analitiklərin qarşı tərəfin real itkilərini müəyyən etməsini çətinləşdirir.

Nəzarətli atəş və potensialın qorunması strategiyası

Keçmiş rəsmilər bildirir ki, İran hakimiyyəti daxilindəki fikir ayrılıqları komanda strukturunu zəiflədib və ordunun genişmiqyaslı salvo hücumları həyata keçirməsinə mane olub.

Hazırda İran İsrailə gündəlik 15-30 ballistik raket və 100-ə qədər pilotsuz uçuş aparatı buraxır, lakin atəş intensivliyini məqsədli şəkildə məhdud saxlayır. Tehranın uzunmüddətli müharibə ehtimalına qarşı öz potensialını qoruyaraq təzyiqi davam etdirmək istədiyi qiymətləndirilir.

ABŞ dövlət katibi Marko Rubio və müharibə naziri Pit Heqset isə İranın imkanlarında ciddi zəifləmə olduğunu və hücumların sayında 90 faiz azalma baş verdiyini bildirir.

Buna baxmayaraq, kəşfiyyat hesabatları göstərir ki, iranlılar bağlanmış buraxılış mövqelərini buldozerlərlə açaraq eyni nöqtələrdən yenidən raket buraxa bilirlər.

İntensiv bombardman və sursat balansı

Digər tərəfdən, “Epic Fury” əməliyyatı çərçivəsində ABŞ ordusu dörd həftəlik müharibə müddətində İrana 850-dən çox “Tomahawk” qanadlı raketi buraxıb.

Bu raketlərin əhəmiyyətli hissəsi əməliyyatın ilk günlərində İrandakı strateji hədəflərə qarşı istifadə olunub.

“American Enterprise Institute”un baş tədqiqatçısı Makkenzi Eqlanın sözlərinə görə, müharibə başlamazdan əvvəl ABŞ Hərbi Dəniz Qüvvələrinin arsenalında təxminən 4.000-4.500 “Tomahawk” raketi mövcud idi.

Sevinc Əliyeva
Ordu.az