Ordu.az xəbər verir ki, sözügedən müqavilə 2026-cı il aprelin 6-sı tarixində “Elbit Systems” tərəfindən elan edilib.
Dörd il davam edəcək müqavilə çərçivəsində buraxılış qurğuları, müxtəlif mənzil və tapşırıq ehtiyaclarına uyğun raket sursatları ilə “gəzən sursat”lar yer alır. Müqaviləyə əlavə olaraq 10 illik texniki xidmət, logistika və dayanıqlılıq dəstək paketi də daxil edilib.
Geniş tədarük paketi və uzunmüddətli dəstək
“Elbit Systems” tərəfindən verilən açıqlamada bildirilib ki, müqavilə yalnız sistemin təhvilini deyil, eyni zamanda uzunmüddətli əməliyyat dayanıqlılığını da əhatə edir. Bu çərçivədə təlim sursatlarının və dəqiq tuşlanan raketlərin, həmçinin müxtəlif mənzil seçimlərinə malik sursatların da paketə daxil olduğu qeyd edilib.
Şirkət təhvil veriləcək buraxılış qurğularının sayı ilə bağlı təfərrüat paylaşmasa da, sistemlərin qarşıdakı on il ərzində effektiv şəkildə istifadəsinə yönəlmiş dəstək infrastrukturunun yaradılacağını bildirib.
Modul quruluş və çoxsaylı sursat qabiliyyəti
PULS sistemi müxtəlif sursat növlərini eyni platforma üzərindən istifadə etməyə imkan verən modul quruluşu ilə diqqət çəkir. Sistem idarəolunmayan raketlər, dəqiq idarə olunan sursatlar və daha uzun mənzilli raket sistemləri arasında tapşırıq ehtiyaclarına uyğun keçid etmə imkanı yaradır.
Bu quruluş istifadəçiyə həm sahəvi zərbə, həm də dəqiq vurma qabiliyyəti qazandıraraq əməliyyat çevikliyi təmin edir.
Hərəkət qabiliyyəti və inteqrasiya çevikliyi
PULS-un müxtəlif təkərli və ya tırtıllı nəqliyyat platformalarına inteqrasiya edilə bilməsi sistemin sahəyə sürətli şəkildə uyğunlaşdırılmasını mümkün edir. Bu xüsusiyyət təlim, texniki xidmət və logistika proseslərində çeviklik yaradır, eyni zamanda mövcud platformalardan istifadəyə imkan verərək xərc üstünlüyü təqdim edir.
Bundan əlavə, sistemin “atəş aç və mövqeyini dəyiş” konsepsiyasına uyğun hərəkət qabiliyyəti müasir döyüş meydanında əks atəş riskini azaltmağa yönəlmiş mühüm amil kimi qiymətləndirilir.
Yerli sənaye əməkdaşlığı və texnologiya transferi
“Elbit Systems” layihə çərçivəsində Yunanıstanın müdafiə sənayesi ilə əməkdaşlıq ediləcəyini açıqlayıb. Bu çərçivədə yerli şirkətlərlə istehsal, texnologiya transferi və texniki bilik paylaşımı planlaşdırılır.
Bu yanaşmanın Yunanıstanın müdafiə təchizatında yerli sənaye iştirakını artırmağa yönəlmiş siyasəti ilə uyğun olduğu bildirilir.
Əməkdaşlığımız daha da güclənir
“Elbit Systems”in prezidenti və baş icraçı direktoru Bezalel Maxlis müqavilə ilə bağlı açıqlamasında bunları deyib:
“Yunanıstan Müdafiə Nazirliyi ilə uzun müddətdir davam edən uğurlu əməkdaşlığımız var. Bu layihə həmin əməkdaşlığı daha da gücləndirir. Yunanıstanın PULS sistemini seçməsi sistemin müasir artilleriya ehtiyacları üçün effektiv və çoxşaxəli həll təqdim etdiyini göstərir”.
Sevinc Əliyeva
Ordu.az
