ABŞ-İran sülh planı masada: Atəşkəs üçün kritik saatlar

ABŞ və İran beş həftədir davam edən münaqişəni sona çatdıra biləcək bir planı qiymətləndirərkən, ABŞ-nin Prezidenti Donald Tramp Hörmüz boğazının yenidən açılması üçün çərşənbə axşamına qədər vaxt verib.

Tramp xəbərdarlıq edib ki, İran bu müddət ərzində qlobal enerji təchizatı baxımından kritik əhəmiyyət daşıyan boğazda dəniz nəqliyyatını yenidən başlatmaq üçün razılaşmaya nail olmasa, yeni hücumlar həyata keçiriləcək.

Pakistanın vasitəçiliyi ilə atəşkəs planı

Məsələyə yaxın mənbələrə görə, Pakistanın vasitəçiliyi ilə hazırlanan plan dərhal atəşkəsin təmin edilməsini və bundan sonra 15-20 gün ərzində daha geniş razılaşma üçün danışıqlara başlanmasını nəzərdə tutur.

Mənbələr bildiriblər ki, Pakistan Silahlı Qüvvələrinin Baş Qərargah rəisi Asim Munir ABŞ-nin vitse-prezidenti Cey Di Vens, ABŞ-nin xüsusi nümayəndəsi Stiv Uitkof və İranın xarici işlər naziri Abbas Əraqçi ilə gecə boyu əlaqədə olub.

İrandan “müvəqqəti atəşkəs” şərtinə rədd cavabı

İranlı yüksək vəzifəli bir məmur “Reuters” agentliyinə verdiyi açıqlamada Tehranın müvəqqəti atəşkəs qarşılığında boğazı açmağı rədd etdiyini və xarici təzyiq və ya vaxt məhdudiyyətini qəbul etməyəcəyini bildirib. Məmur əlavə edib ki, Vaşinqtonun daimi atəşkəsə hazır olmadığı qənaəti mövcuddur.

ABŞ, İsrail və regiondakı mənbələrə əsaslanan məlumatlara görə, tərəflər müharibənin daimi şəkildə başa çatmasına zəmin yarada biləcək iki mərhələli plan çərçivəsində təxminən 45 günlük atəşkəsi də qiymətləndirir.

Tehrana gecə hücumları: İran mediasına görə ən azı 6 uşaq həyatını itirib

İranın dövlət mediası gecə ərzində Tehrana edilən hava hücumları nəticəsində yaşı 10-dan aşağı olan ən azı altı uşağın həyatını itirdiyini bildirib.


Yarırəsmi “Mehr” xəbər agentliyinin yaydığı məlumata görə, hücumlar İsrail və ABŞ-nin İrana qarşı əməliyyatları çərçivəsində həyata keçirilib. Həmin məlumatda paytaxtın şərqində yerləşən yaşayış məntəqələrinə edilən hücumlar nəticəsində dörd nəfərin öldüyü, yeddi nəfərin yaralandığı qeyd olunub.

“Fars” xəbər agentliyinə görə isə Tehranın cənub-qərbində yerləşən Bəharestan rayonunda iki yaşayış binasına edilən hücum nəticəsində ən azı 13 nəfər həyatını itirib. Rəsmilər dağıntılar altında qalanlar üçün axtarış-xilasetmə işlərinin davam etdiyini açıqlayıblar.

Dağıntılar altında axtarış davam edir

İran Qızıl Aypara Cəmiyyətinin paylaşdığı görüntülərdə xilasedici qrupların yaşayış məntəqəsində dağıntılar altında qalanları axtardığı görünür. Görüntülərin dəqiq yeri və çəkilmə vaxtı müstəqil mənbələr tərəfindən təsdiqlənməyib.

Dövlət mediasına aid videolarda Bəharestan və Tehranın şərqində ağır zərər görmüş binalar və axtarış-xilasetmə işlərində iştirak edən qruplar yer alıb.

Universitet yaxınlığında hücum

Sosial mediada yayılan bir videoda Şərif Texnologiya Universiteti yaxınlığında baş verən hücumdan sonra yaranan zərər görüntülənib. Müstəqil mənbələr videodakı tikililərin peyk görüntüləri ilə uyğunlaşdırılması nəticəsində yerin təsdiqləndiyini bildirib.

İsraildən “hücum dalğası” açıqlaması

İsrail Müdafiə Qüvvələri (IDF) bazar ertəsi səhər saatlarında yaydığı qısa açıqlamada Tehrandakı hədəflərə qarşı “hücum dalğası” həyata keçirdiyini bildirib.

Hücumlarla bağlı müstəqil təsdiq hələlik mümkün olmayıb və itkilər və zərər barədə məlumatlar əsasən İran dövlət mediasına əsaslanır.

İran, müvəqqəti atəşkəs qarşılığında Hörmüz boğazını açmağı rədd etdi

İranlı yüksək vəzifəli bir məmur “Reuters” agentliyinə verdiyi açıqlamada Tehranın “müvəqqəti atəşkəs” qarşılığında Hörmüz boğazını yenidən açmağı rədd etdiyini bildirib.

Məmur qeyd edib ki, İran Vaşinqtonun daimi atəşkəsə hazır olmadığı qənaətindədir və bu şəraitdə boğazın açılması gündəmdə deyil.

Eyni məmur Pakistan tərəfindən təqdim olunan təcili atəşkəs təklifinin Tehran tərəfindən qəbul edildiyini və qiymətləndirilmə prosesinin davam etdiyini təsdiqləyib. Lakin İran qərar qəbul etmək üçün xarici təzyiq və ya vaxt məhdudiyyətini qəbul etməyəcəyini vurğulayıb.

Dünya neft ticarətinin mühüm hissəsinin keçdiyi Hörmüz boğazı mövcud münaqişədə strateji əhəmiyyət daşıyan əsas elementlərdən biri kimi önə çıxır.

İran, Küveytdə Bubiyan adasında ABŞ qüvvələrini hədəf aldığını açıqladı

İran Küveytə məxsus Bubiyan adasında yerləşən ABŞ qüvvələrini hədəf aldığını açıqlayıb. İran dövlət mediasında yayımlanan video müraciətdə çıxış edən “Xatəm əl-Ənbiya” Mərkəzi Qərargahının sözçüsü İbrahim Zülfikari hücumun pilotsuz uçuş aparatları ilə həyata keçirildiyini bildirib.

Zülfikari qeyd edib ki, İrana məxsus pilotsuz uçuş aparatları adadakı peyk sistemlərini və sursat anbarlarını hədəf alıb, ABŞ qüvvələrinin əvvəllər dəfələrlə hücuma məruz qaldığı Ərifcan düşərgəsindən Bubiyan adasına köçürüldüyünü iddia edib.

Küveyt rəsmiləri isə İranın hücumundan sonra ölkənin şimalında yerləşən yaşayış məntəqəsinə düşən qalıqlar nəticəsində altı nəfərin yaralandığını açıqlayıb.

Fars körfəzinin şimal-qərbində yerləşən Bubiyan adası Küveytin ən böyük sahil adası kimi tanınır və strateji mövqeyinə görə hərbi baxımdan əhəmiyyətlidir.

Hücumla bağlı ABŞ tərəfindən hələlik rəsmi açıqlama verilməyib və hadisənin müstəqil mənbələr tərəfindən təsdiqlənmədiyi bildirilib.

Sevinc Əliyeva
Ordu.az